Հայտնի է այսօր՝ մարտի 4-ին «Նուբարաշեն» ՔԿՀ-ի դիմաց արձակված կրակոցներից մահացած երրորդ մարդու անունը։ Ոստիկանությունից դեպքի վայրում աշխատող NEWS.am-ի թղթակցին հաղորդեցին, որ սպանվածը Մեսրոպ Մելիքյանն է։ Նա մահացել է տեղում։ Նրա մարմինը դեռ ընկած է դեպքի վայրում, որտեղ աշխատում են մեծ թվով ոստիկաններ եւ քննիչներ։ Նա հրազենային մահացու վնասվածք է ստացել գլխի շրջանում։
Ավելի վաղ ոստիկանության լրատվական ծառայությունից հաստատել էին տեղեկությունը, որ մահացած երեք անձանցից մեկը Լեւոն Ղազարյանն է, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է Դերո անունով։ Երկուսն էլ մահացել են հիվանդանոցում։
Ավելի վաղ NEWS.am-ը հայտնել էր, որ ժամը 13։59-ին ոտիկանությունը ահազանգ է ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել են 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ։ Հիվանդանոցից մեզ հայտնեցին, որ 2 երիտասարդներին իրենց մոտ տեղափոխել են արդեն հրազենային վնասվածքներից մահացած վիճակում։ Նախնական տեղեկություններով մի քանի հոգի կրակ են բացել «Նուբարաշեն» ՔԿՀ-ի մոտ, որի հետեւանքով կա երեք զոհ:
Լուսանկարները՝ Արսեն Սարգսյանի/NEWS.am