Հուլիսի 22-ին Թբիլիսիի քրեական գործերով վերաքննիչ դատարանում կայացել է Վահագն Չախալյանի գործով առաջին դատալսումը, որն անցել է օրենքի կոպիտ խախտումներով:
Ինչպես NEWS.am-ին հայտնեց «Երկիր» միության ծրագրերի համակարգող Ռոբերտ Թաթոսյանը, դատավորը Վ. Չախալյանին ուղղված իր հարցերով ցույց է տվել, որ իր համար նրա մեղավորությունն արդեն ապացուցված է: "Օրինակ, նա հարցնում էր, թե 2006 թվականի ցույցերի ժամանակ ինչո՞ւ ես մտել համալսարանի շենք, ինչո՞ւ ես մտել դատարանի շենք: Բանն այն է, որ ըստ մեղադրանքի, Չախալյանը 2006 թվականին տեղի ունեցած ցույցերի կազմակերպիչներից ու ակտիվ մասնակիցներից է եղել: Փաստորեն դատավորն, առանց անմեղության կանխավարկածը հաշվի առնելու իր համար արդեն այդ մարդուն մեղավոր է համարում եւ հարցնում է, թե ինչո՞ւ ես դեմ, որ վրացիները սովորեն Ախալքալաքի համալսարանում, նաեւ հայտարարում է, թե «դու ռասիստ ես»,- նշեց Ռ. Թաթոսյանը:
Նրա ներկայացմամբ, դատավարության ընթացքում պաշտպանական կողմի գրեթե բոլոր միջնորդությունները մերժվել են: Դրանցից մեկը վերաբերել է Ախալքարակի ոստիկանապետ Սամվել Պետրոսյանին եւ նրա որդուն հարցաքննության կանչելուն, քանի որ նրանք 2006 թվականին տեղի ունեցած ցույցերի գործով, որտեղ բողոքարկվում էր տեղական ընտրությունների արդյունքները, անցնում են որպես տուժող: Պաշտպանական կողմը նաեւ զենքի դատահետքաբանական փորձաքննության միջնորդություն է ներկայացրել, որը նույնպես մերժվել է: Եվ միայն այն բանից հետո, երբ պաշտպանական կողմը միջնորդել է, որ այդ դատահետքաբանական փորձաքննությունը կատարվի իրենց հաշվին, դատարանը ընդունել է միջնորդությունը: Դրանից զատ, թույլ չի տրվել հայ լրագրողներին ձայնագրել դատական նիստը, իսկ նիստի վերջում դատավորը թույլ չի տվել, որպեսզի Վահագն Չախալյանը հանդես գա հայտարարությամբ: Դատական նիստը հետաձգվել է երկու ամսով` մինչեւ սեպտեմբերի 18-ը:
Հիշեցնենք, որ «Միասնական Ջավախք-ժողովրդավարական դաշինք» քաղաքական շարժման առաջնորդ եւ Ջավախքի երիտասարդական մարզամշակութային միության նախագահ Վ. Չախալյանը ձերբակալվել է 2008 թվականի հուլիսի 21-ի լույս 22-ի գիշերը, իսկ այս տարվա ապրիլի 7-ին էլ Ախալցխայում առաջին ատյանի դատարանի վճռով դատապարտվել է 10 տարվա ազատազրկման: Նա մեղադրվում է մի քանի հոդվածներով` զենք զինամթերքի ձեռք բերում եւ պահպանում, հանրային կարգը խախտող զանգվածային միջոցառումների կազմակերպում, ոստիկանության աշխատակցին ցույց տված զանգվածային դիմադրություն: