Քանաքեռ-Զեյթուն վարչական շրջանի Լամբադա կամրջի մոտ հուլիսի 22-ին, ժամը 19:00-ի մոտ 267 համար երթուղու ավտոբուսի վթարի հետեւանքով «Սուրբ Գրիգոր Լուսավորիչ» բժշկական կենտրոն տեղափոխված 6 ուղեւորներից 4-ը ստացել են առաջին բուժօգնություն եւ դուրս գրվել, իսկ հղի կինն ու եւս մեկ տուժած հոսպիտալացվել են: Այս մասին NEWS.am-ին ասաց հիվանդանոցի փոխտնօրեն Գագիկ Մանուկյանը:
Նրա փոխանցմամբ՝ սկզբում հիվանդանոց են ընդունվել միանգամից 5 հիվանդ, այնուհետեւ տեղափոխվել է եւս մեկը: Նրանցից 4-ը հետազոտվել են եւ ուղարկվել տուն, նրանց ծախսերը կհոգա պետությունը:
«17 շաբաթական հղիության մեջ գտնվող երիտասարդ կնոջը կտեղափոխենք ծննդատան պաթոլոգիայի բաժին, վտանգավոր ոչինչ չկա: Բացի նրանից՝ մոտ 40 տարեկան մի տղամարդ էլ է հոսպիտալացվել, նա էլ ունի քթի կոտրվածք, այս պահին քիթ-կոկորդի բաժանմունքում է»,- ասաց նա:
Թիվ 1 համալսարանական հիվանդանոցից էլ NEWS.am-ին հայտնեցին, որ իրենց մոտ տեղափոխված 4 ուղեւորներն էլ հետազոտվել են եւ ուղարկվել տուն. նրանք ունեին թեթեւ մարմնական վնասվածքներ:
Ավելի վաղ NEWS.am-ը, վկայակոչելով ԱԻՆ-ին, հայտնել էր, որ «Բոգդան» մակնիշի 267 համարի ավտոբուսը, որը սպասարկում է Երեւան-Աբովյան երթուղին, ժամը 19:00-ի սահմաններում հարվածել է Mercedes մակնիշի մեքենայի, այնուհետեւ գովազդային վահանակի: Վթարի հետեւանքով տուժել էր 15 ուղեւոր, որից 9-ին տեղափոխել էին հիվանդանոց:
