Ryanair ավիաընկերության չվերթով երթեւեկող անսթափ վիճակում գտնվող Լեհաստանից ուղեւորն ինքնաթիռի ելքը շփոթել է զուգարանի դռան հետ: Վայրէջքից հետո օդանավի դուռը բացել փորձող ուղեւորը ձերբակալվել եւ կանգնել է դատարանի առջեւ: Այս մասին գրում է Лента.Ру-ն՝ հղում կատարելով իռլանդական The Independent պարբերականին:
Ինքնաթիռը Կրակով-Դուբլին չվերթը կատարել է 2014թ. հուլիսի 11-ին: 26-ամյա Թոմաս Մուչան ինքնաթիռ է բարձրացել արդեն հարբած եւ, ինչպես պարզվել է հետագայում, ինքնաթիռ գարեջուր է տարել, չնայած օդանավում սեփական ալկոհոլի օգտագործումն արգելվում է: Հաղորդվում է, որ երիտասարդն իրեն նորմալ է պահել, սակայն ինքնաթիռից իջնելու նրա փորձը վախեցրել է մյուս ուղեւորներին, քանի որ տեխնիկապես նրան հաջողվել է բացել դուռը, բայց օդի ճնշման հետեւանքով կրկին փակվել է:
Հուլիսի 22-ին Դուբլինի քաղաքային դատարանում դատալսման ժամանակ Մուչան խոստովանել է մեղքը: Իր անսթափ վիճակը երիտասարդը բացատրել է վախով. սա նրա առաջին թռիչքն է եղել: Մուչան ընդգծել է, որ գիտակցում է, թե ինչ վտանգի է ենթարկել չվերթի մյուս ուղեւորներին:
Քանի որ մեղադրյալն ընդունել է մեղքը, նրան ընդամենը տուգանել են 200 եվրոյի չափով:
