ԱՄՆ-ում «Hyundai» հետ է կանչում ավելի քան 419 հազար ավտոմեքենա ու ամենագնաց, որպեսզի ուղղի կասեցման արգելակները, լուծի յուղի արտահոսքի խնդիրները, հաղորդում է «kansas.com»-ը:
Սա վերաբերում է 2001-2006թթ. տարիների «Santa Fe» 225 հազար ամենագնացների: Փորձագետների համաձայն՝ առջեւի պտուտակային զսպանակները այդ մեքենաներում կարող են ժանգոտել եղանակային պայմանների պատճառով եւ կոտրվել՝ վնասելով անվադողերը, ինչը կարող է վթարների հանգեցնել: Մեքենայի սեփականատերերը այդ մասին կտեղեկանան սեպտեմբերի վերջին:
Հետ են կանչվելու նաեւ «Sonata» մակնիշի 133 հազար 75 մեքենա, որոնք արտադրվել են 2011թ.-ին: Դրանցում կարող են արտահոսել արգելակման հեղուկը, ինչն ավելացնում է արգելակման ուղու երկարությունը: Բացի այդ, «Hyundai»-ն հետ է կանչում 2007-2012թթ.-ի «Veracruz» մակնիշի 61 հազար 122 ամենագնաց: Այստեղ կարող է արտահոսել եւ գեներատորի մեջ հայտնվել մեքենայի յուղը, ինչի հետեւանքով անջատվեն էներգոհամակարգերը եւ կանգ առնի շարժիչը:
«Hyundai» ընկերության ներկայացուցիչն անվճար կվերացնի հնարավոր տեխնիկական խնդիրները:
