Ընդդիմադիր «Ժառանգություն» խմբակցության պատգամավոր Զարուհի Փոստանջյանն իրավախախտում չի կատարել: Այս մասին սեպտեմբերի 29-ին հայտարարել է Ազգային Ժողովի ՀՅԴ խմբակցության պատգամավոր Արծվիկ Մինասյանը՝ հիշեցնելով շուրջ մեկ տարի առաջ խորհրդարանում տեղի ունեցած միջադեպը, երբ Փոստանջյանը հավաքել էր պատգամավորների քվեարկության քարտերը՝ խափանելով նիստը:
«Դա ընդամենը քաղաքացիական բողոքի ձեւ էր, եւ պատիժն այս դեպքում ոչ մի կերպ չի արդարացվում»,- հայտարարեց Մինասյանը: Այս դեպքում, ըստ նրա, հարկավոր է պարզապես քվեարկությունը չկայացած համարել տեխնիկական պատճառներով:
«Նույն հաջողությամբ կարելի է պատասխանատվության կանչել խորհրդարանական էլեկտրիկին, եթե դահլիճում հոսանքն անջատվի»,- հայտարարել է Մինասյանը պատգամավորների ծիծաղի եւ հարցերի ներքո. «Այսինքն՝ պատգամավորներին համեմատում եք էլեկտրիկի հե՞տ»:
