Տաջիկստանի նախագահ Էմոմալի Ռախմոնը խորհրդարանի քննարկմանն է ուղարկել «Համաներման մասին» օրինագիծ, որը նախատեսում է քրեական եւ դատական հետապնդումից ազատել շուրջ 10 հազար մարդու, հայտնում է ՏԱՍՍ-ը` վկայակոչելով նախագահի մամուլի ծառայությունը:
Աղբյուրը նշում է, որ համաներումը կդառնա ամենազանգվածայինը հետխորհրդային Տաջիկստանի պատմության մեջ: «Տվյալ օրինագիծն ընդունելու դեպքում համաներում է շնորհվելու 10 հազար կասկածյալների, մեղադրյալների, դատվածների եւ դատապարտվածների», - մեջբերում է աղբյուրը մամուլի ծառայության հաղորդագրությունը:
Օրինագիծը տարածվում է այն անձանց վրա, ովքեր հանցագործություն են կատարել նախքան այն ուժի մեջ մտնելը եւ որոնք համաներման կարիք ունեն` սեռով, տարիքով, առողջական վիճակով եւ այլ հանգամանքներով պայմանավորված: Օրինագիծը չի ենթադրում այն անձանց ազատագրում, որոնք դատապարտված են սպանության, բռնաբարության, պետական դավաճանության, բռնի իշխանազավթման, սահմանադրական կարգը բռնի փոխելու հրապարակային կոչի, լրտեսության, սադրանքի եւ ահաբեկչության հետ կապված հանցագործությունների համար:
