ՆԱՏՕ-ի Խորհրդարանական վեհաժողովում հայկական պատվիրակությունն անպայման կբարձրացնի ադրբեջանական բանակի կողմից ԼՂՀ ԶՈՒ խոցված ուղղաթիռի հարցը, NEWS.am-ի թղթակցին ասաց ՆԱՏՕ-ի ԽՎ-ում հայկական պատվիրակության անդամ, ԱԺ «Ժառանգություն» խմբակցության պատգամավոր Թեւան Պողոսյանը։
«Իհարկե, առաջին իսկ հնարավորության դեպքում մենք կբարձրացնենք ադրբեջանական բանակի կողմից ԼՂՀ ԶՈՒ խոցված ուղղաթիռի հարցը։ Ադրբեջանի գործողությունների հետ կապված բոլոր հարցերը առանձնակի կերպով պետք է բարձրացվեն», - ընդգծել է Թեւան Պողոսյանը։
Պատգամավորը հավելել է, որ ՆԱՏՕ-ի Խորհրդարանական վեհաժողովի աշխատանքները սկսվել են նոյեմբերի 22-ին եւ, համաձայն օրակարգի, հինգ հանձնաժողովներում ներկայացվում են համապատասխան զեկույցներ։
«Վաղը կկայանան հանձնաժողովի բանաձեւերի քննարկումները, եւ նոյեմբերի 24-ին տեղի կունենա լիագումար նիստը», - նշել է Թեւան Պողոսյանը՝ հավելելով, որ եռօրյա աշխատանքների ընթացքում հայկական պատվիրակության ձայնը լսելի կլինի։
Հիշեցնենք, նոյեմբերի 12-ին Ադրբեջանի ԶՈՒ-ն խոցել էր ԼՂՀ ԶՈՒ ուսումնավարժական թռիչք իրականացնող Մի-24 ուղղաթիռը։ Երեք օդաչուները զոհվել էին։ NEWS.am-ին ԼՂՀ պաշտպանության բանակից հայտնեցին, որ մարտական առաջադրանքի կատարման արդյունքում դեպքի վայրից դուրս են բերվել ուղղաթիռի անձնակազմի մասունքները եւ ուղղաթիռի անհրաժեշտ մասերը։ Գործողության ընթացքում ոչնչացվել է ադրբեջանցի երկու զինվոր։ ԼՂՀ բանակը կորուստներ չի ունեցել։