Ամերիկյան Նյու Ջերսի նահանգի Էնգլվուդ քաղաքի ընկերության գլխավոր ֆինանսական տնօրենը, ով ԱՄՆ-ի եւ Հայաստանի քաղաքացիություն ունի, ձերբակալվել է՝ ընկերությունից շուրջ 6.3 մլն դոլար հափշտակելու եւ ինքն իրեն գաղտնի վճարումներ կատարելու մեղադրանքով: Ըստ NJ.com-ի, հետաքննությունը վարել է Հետախուզությունների դաշնային բյուրոն:
50-ամյա Կոմիտաս Կարապետ Հարթունյանին սպառնում է 20 տարվա ազատազրկում՝ էլեկտրոնային հաղորդակցության միջոցների օգտագործմամբ խարդախության համար, որը տեւել է 2007 թվականի ապրիլից մինչեւ 2014-ի ապրիլը: Դատախազությունը հրաժարվել է նշել ընկերության անունը, որտեղ տղամարդն աշխատել է որպես գլխավոր ֆինանսական տնօրեն: Սակայն NorthJersey.com-ի տվյալներով, նա աշխատել է «Harco Industries»-ում:
Դատախազների խոսքով, Հարթունյանը «MGB» անվանումով ընկերություն է գրանցել իր տան հասցեով եւ պնդել, որ բեռնափոխադրումների ծառայություններ է մատուցում: Այնուհետեւ այնպես է արել, որ ընկերությունը, որտեղ նա ֆինանսական տնօրեն է աշխատել, կտրոններ ուղարկի իր ընկերությանը՝ կեղծելով երկու տնօրենի ստորագրությունները: Ստացված միջոցները նա օգտագործել է սեփական ծախսերի համար՝ ներառյալ վարկային քարտով վճարումները, հիփոթեքային վճարումները, ավտոմեքենայի ծախսերն ու դպրոցական դրամահավաքները:
Դատավոր Ջեյմս Քլարքը վճռել է, որ Հարթունյանը տնային կալանքի տակ է մնալու՝ գտնվելու վայրի վերահսկողության էլեկտրոնային սարքով, մինչեւ 500 հազար դոլարի չափով գրավի երաշխավոր գտնելը: ԱՄՆ-ի եւ Հայաստանի քաղաքացիություն ունեցող տղամարդուն նաեւ հրահանգել են հանձնել անձնագիրը:
