Քենիայի Գերագույն դատարանում քննվում է նախկին վարչապետ Ռաիլ Օդինգայի դեմ հայ եղբայրներից մեկի հայցը: Ըստ քենիական «Daily Nation» պարբերականի, 2006 թվականին ներկայացված հայցում Արթուր Մարգարյանը, որին մեղադրում էին վարձու մարդասպան լինելու մեջ, Լիբերալ-դեմոկրատական կուսակցության այն ժամանակվա առաջնորդ Ռաիլ Օդինգային մեղադրում է զրպարտելու մեջ:
Արթուր Մարգարյանի եւ նրա եղբոր՝ Արթուր Սարգսյանի անունները 2006 թվականին թերթերի վերնագրերում հիշատակվում էին կառավարության հետ նրանց կապերի մասին պնդումների առնչությամբ: Առաջ էին քաշվում ենթադրություններ, որ նրանք վարձու մարդասպաններ են, եւ նրանց հարցը քննարկվում էր խորհրդարանում: 2006 թվականի հունիսին եղբայրներին արտաքսում են երկրից, Նայրոբիի միջազգային օդանավակայանում զենքի հետ կապված միջադեպից հետո: Մարգարյանը մի անգամ առաջարկել է հետ վերցնել Օդինգայի դեմ ներկայացրած հայցը: «Եթե ներողություն խնդրեք, ես պատրաստ եմ հետ վերցնել հայցս եւ ներել ձեզ»,- 2006 թվականի ապրիլին լրագրողներին ասել էր Մարգարյանը:
Հիշեցնենք, որ մի քանի տարի առաջ Wikileaks-ը հրապարակեց Քենիայում ԱՄՆ դեսպանության ներկայացուցիչ Ուիլիամ Բելամի 2006 թվականի զեկույցը, որում հաղորդվում էր, որ «Արթուր եղբայրները» բազմաթիվ քենիացիների են անհանգստացրել: Նա նշել էր, որ «վարձու մարդասպաններին» երկիր են բերել եւ պաշտպանում են կառավարությանը մոտ կանգնած պաշտոնատար անձիք: Եղբայրների ժամանումը երկիր համընկել էր հսկայական քանակությամբ կոկաինի փոխադրման հետաքննության հետ:
Նշենք նաեւ, որ հայ եղբայրները, որ խարդախության եւ թմրանյութերի վաճառքի մեղադրանքներից հետո հեռացել էին Քենիայից, հայտնվել են Մալդիվներում: Նրանց գործունեությունը գրավել է տեղական մամուլի ուշադրությունը: Արթուրների հարցը նույնիսկ հասել է Մալդիվների Հանրապետության խորհրդարան:
