Բազմաթիվ դրվագներով քրեական հանցագործության դեպքում ծառայողական քննություն անելը հանցագործության շարունակությունն է: Այս մասին NEWS.am-ի թղթակցի հետ զրույցում ասաց «Հիմնադիր խորհրդարանի» անդամ Վարուժան Ավետիսյանը:
Նա շեշտեց, որ այս պարագայում ծառայողական քննությունը նպաստում է, որ կոծկեն դեպքը: «Նման դեպքերում ծառայողական քննություն անել եւ դրա կեղծ արդյունքները ցույց տալ, թե կարգը կվերականգնվի, հանցագործության շարունակությունն է, ինքնին հանցագործություն»,-ասաց Վարուժան Ավետիսանը:
Նա համոզված չէ, որ քննության արդյունքում նշված 10 ոստիկաններին կազատվեն աշխատանքից, քանի որ բազմիցս նման դեպքերի ենք ականատես եղել, երբ իմիտացիա են հանում իբր հանում են, իսկ որոշ ժամանակ անց այլ պաշտոնի են նշանակում:
Նշենք, որ մանրակրկիտ վերլուծության ենթարկելով ծառայողական քննության ընթացքում ձեռք բերված բոլոր ապացույցները` հանձնաժողովը որոշեց միջնորդել Լեռնային Ղարաբաղի Հանրապետության ոստիկանության պետին` ոստիկանության 25 ծառայողների ըստ իրենց թույլ տված կարգապահական խախտումների բնույթի եւ ծանրության աստիճանի ենթարկել համապատասխան տույժերի: Հանձնաժողովի որոշման համաձայն` ոստիկանության 10 ծառայողներ ենթակա են ոստիկանությունում ծառայությունից ազատման, 9-ը` խիստ նկատողության, իսկ 6-ը` նկատողության:
Հիշեցնենք, որ հունվարի 31-ին «Հիմնադիր խորհրդարանը» հայտարարություն էր տարածել, որ Բերձոր չհասած ոստիկանական մեքենաներով անհայտ անձինք հարձակվել են իրենց ավտոերթի մասնակիցների վրա, ծեծի են ենթարկել նրանց, կոտրել բոլոր մեքենաները եւ դրոշները: «Հիմնադիր խորհրդարանի» ներկայացուցիչ Ժիրայր Սեֆիլյանը եւ երթի բազմաթիվ մասնակիցներ ստացել են մարմնական վնասվածքներ:
