Չիկագոյում (ԱՄՆ) ողբերգական միջադեպ է տեղի ունեցել: 64-ամյա Իֆտիհար Հուսեյնը, հետեւելով ավտոմեքենայի GPS-ի հրահանգներին, որոշել է կիսակառույց կամրջով անցնել: Երբ տղամարդը հասկացել է սխալը, չափազանց ուշ է եղել. նա չի հասցրել արգելակել եւ մեքենան ցած է ընկել ու անմիջապես հրդեհվել:
Իֆտիհարը հասցրել է դուրս թռչել այրվող մեքենայից, սակայն կնոջը՝ 51-ամյա Զուխրա Հուսեյնին փրկել չի կարողացել: Կինը լուրջ այրվածքներ եւ վնասվածքներ է ստացել, ինչի հետեւանքով հիվանդանոցում մահացել է:
Ըստ Lifenews-ի, կամուրջը, որով անցել է տարեց զույգը, փակվել է դեռեւս 2009 թվականին, սակայն Հուսեյնն այդ մասին չի իմացել: Տղամարդն ուշադրություն չի դարձրել նախազգուշացնող ճանապարհային նշաններին եւ չի օգտվել շրջանցիկ ճանապարհից՝ հույսն ամբողջությամբ դնելով ավտոմեքենայի GPS-ի տվյալների վրա:
