Եվրոպայի խորհրդի խորհրդարանական վեհաժողովի գրասենյակը խորհուրդ է տվել ռուսական պատվիրակության լիազորությունների քննարկման հարցը հետաձգել մինչեւ հունիս։ Այս մասին հայտարարել է Ռուսաստանի հարցերով բանախոս Թեոդոր Բակոյանիսը։
«Կողմերի միջեւ ոչինչ տեղի չի ունենում»,- պարզաբանել է Բակոյանիսը՝ հայտարարելով, որ պատրաստ է անհրաժեշտության դեպքում ժամանել Մոսկվա։
Ստրասբուրգում ապրիլի 19-ին մեկնարկում է ԵԽԽՎ գարնանային նստաշրջանը, որտեղ առանցքային թեմաներից մեկն է լինելու անօդաչու թռչող սարքերի օգտագործման պարագայում մարդու իրավունքների պաշտպանության հարցը։ Կողմերը կքննարկեն նաեւ Ուկրաինայում տիրող իրավիճակը, տեղեկացնում է BBC-ի Ռուսական ծառայությունը։
ԵԽԽՎ ձմեռային նստաշրջանի ընթացքում վեհաժողովը ուժի մեջ էր թողել ռուսական պատվիրակության դեմ պատժամիջոցները, որոնք ընդունվել էին Ղրիմի անեքսիայից հետո։ Դրան ի պատասխան՝ Ռուսաստանը հայտարարել էր, որ մինչեւ 2015թ. վերջը կասեցնում է իր մասնակցությունը վեհաժողովի նիստերին։