Ստեփանավանում երեխաներին հրդեհից փրկելու համար պատուհանից նետած կինը ապրում է սոցիալապես ծանր պայմաններում: NEWS.am-ին հայտնի դարձավ, որ ընտանիքի հայրը աշխատում է անասագոմում: Նրանք ունեն նաեւ 3-րդ երեխա, ով ապրում է տատիկի հետ, քանի որ տնակը փոքր է:
Ընտանիքը տնակը վարձակալել էր հետագայում այն գնելու նպատակով, սակայն այժմ ստիպված կլինեն եւ այրված տնակի գումար տալ, եւ նոր վայր գտնել ապրելու համար: Այժմ նրանք ոչ ապրելու տեղ ունեն, ոչ հագուստ:
Իսկ թե ինչի հետեւանքով է առաջացել հրդեհը, դեռ հայտնի չէ, ասում են, թե էլեկտրական լարերի անսարքության խնդիր է եղել:
Ավելի վաղ հայտնել էինք, որ ապրիլի 22-ին, ժամը 08.12-ին տեղեկություն է ստացվել, որ Լոռու մարզի Ստեփանավան քաղաքի 4-րդ միկրոշրջանում այրվում է վագոն-տնակ: Դեպքի վայր է մեկնել մեկ մարտական հաշվարկ:
Տեղում պարզվել է, որ 4-րդ միկրոշրջանի 1-ին փողոցի թիվ 24 հասցեում մասամբ այրվել է Ա. Գ.-ին պատկանող վագոն-տնակը` գույքով (9x3մ): Հրդեհը մեկուսացվել է ժամը 08.41-ին, մարվել` 09.12-ին:
Մորը եւ երկու երեխաներին տեղափոխել են Ստեփանավանի բժշկական կենտրոն: Հիվանդանոցի տնօրեն Ռոբերտ Կոծինյանը NEWS.am-ի թղթակցի հետ զրույցում ասել է, որ մայրը պատմել է, որ 3 ամսական երեխային պատուհանից գցել է, որ չայրվի, իսկ 3 տարեկանին իր հետ հանել տնից: 3 ամսական բալիկի մոտ որեւէ խնդիր չկա, նրան հենց երեկ էլ դուրս են գրել, 3 տարեկան երեխայի ձեռքերին մի փոքր այրվածքներ կան, իսկ հիմնականում այրվածքներ է ստացել մայրը, նա դուրս կգրվի մեկ շաբաթից: