Հետեւողականություն դրսեւորելու դեպքում «Հիմնադիր խորհրդարանի» հանրահավաքները ժամանակի ընթացքում ավելի մարդաշատ կդառնան։ Այս մասին այսօր` մայիսի 30–ին, Ազատության հրապարակում «Հիմնադիր խորհրդարանի» հանրահավաքից առաջ NEWS.am–ին ասաց շարժման առաջնորդ Ժիրայր Սեֆիլյանը։

«Մենք նախընտրական ժամանակահատվածում պայքարող ուժ չենք, եւ մրցակից չենք այլ ուժի հետ։ Մեր պայքարի բնույթն ազգային ազատագրական է, եւ այդ հարցում մենք պետք է լինենք համառ եւ հետեւողական, մինչեւ մեր խոսքը տեղ հասնի, վստահություն լինի ժողովրդի մոտ, եւ կարծում եմ, կգա ժամանակ, երբ ժողովրդի սակավամարդությունը կփոխարինվի բազմամարդությամբ»,– ասաց Սեֆիլյանը։

«Հիմնադիր խորհրդարանի» անդամները  Ազատության հրապարակ են եկել «Բանտերով մեզ չեք կոտրի», «Կազմակերպված ժողովուրդն ամենազոր է», «հայաստանի ազատագրումը մոտ է», «Ազատության ծնունդը ռեժիի մահն է» գրություններով պաստառներով եւ «Հարյուրամյակն առանց ռեժիմի» շարժման դրոշներով։

NEWS.am–ի թղթակիցը հաղորդում է, որ սակավամարդ հավաքը հսկում են մի խումբ ոստիկաններ` Երեւանի փոխոստիկանապետ Վալերի Օսիպյանի գլխավորությամբ։