Արեւմուտքը մինչեւ հիմա երեսպաշտորեն է վերաբերվում ահաբեկչությանը՝ այն որպես այդպիսին բնորոշելով միայն այն ժամանակ, երբ ինքն է սպառնալիք զգում եւ դա «հեղափոխություն» ու «մարդու իրավունքների եւ ազատությունների համար պայքար» է բնութագրում, երբ գործ է ունենում մեզ հետ։ Այս մասին Դամասկոսում հասարակական կազմակերպությունների, Առեւտրա-արդյունաբերական, Զբոսաշրջության եւ Գյուղատնտեսության պալատների ղեկավարների առջեւ ունեցած ելույթի ժամանակ հայտարարել է Սիրիայի նախագահ Բաշար Ասադը ։
Նրա խոսքով՝ ահաբեկչությունը այլասերված գաղափարախոսություն եւ շիզոֆրենիկ պրակտիկա է, որը ծագել է հետամնացության եւ տգիտության մթնոլորտում։ Սակայն չնայած Սիրիայում տիրող բարդ իրավիճակին՝ դիմակները պատռված են, եւ բոլորին պարզ է Սիրիայի շուրջ տիրող կեղծիքն ու զրպարտությունը։
Ասադը նաեւ նշել է, որ ճգնաժամի ամենասկզբից Սիրիան հենվել է միայն սեփական ուժերի եւ իսկական բարեկամների՝ Չինաստանի ու Ռուսաստանի վրա, որոնք վճռորոշ դեր են խաղացել, որպեսզի ՄԱԿ ԱԽ-ն չվերածվի սուվերեն պետությունների դեմ սպառնալիք եւ ագրեսիա տարածող գործիքի։
«Սիրիական դոկտրինը հիմնվում է արյունահեղ պատերազմին վերջ դնելու ցանկացած նախաձեռնություն պաշտպանելու վրա։ Իրանը մեծ օգնություն է ցուցաբերել Սիրիային՝ գիտակցելով, որ ահաբեկչության դեմ պայքարը մեկ երկրի գործ չէ։ Արեւմուտքի երկրների եւ ընդդիմության շարքերում նրանց գործակալների համար Հայրենիքը դավաճանելը լավ բան է համարվում։ Սիրիայի ժողովուրդը, չնայած գլոբալ պատերազմին, մինչեւ հիմա ամուր կանգնած է եւ զոհաբերում է ինքն իրեն հանուն Հայրենիքի։ Նա երբեք զիջումների չի գնա իր անկախության եւ ինքնիշխանության հարցում։ Ուստի ցանկացած առաջարկ, որը հիմնված չէ ահաբեկչության դեմ պայքարի վրա, անիրատեսական է»,- հայտարարել է Սիրիայի Արաբական Հանրապետության նախագահը։
Բաշար Ասադը նաեւ նշել է, որ որոշ շրջանների բնակիչներ կռվել են կառավարական բանակի հետ, եւ դա վճռորոշ դեր է խաղացել ահաբեկիչներին լիկվիդացնելու գործում, քանի որ ահաբեկչության դեմ ընթանում է համաժողովրդական պայքար, գրում է ՍԱՆԱ գործակալությունը։