Հայաստանում, բոլոր դեպքերում, պետք է սպասել դոլարի թանկացման: Այս մասին այսօր՝ օգոստոսի 4-ին, լրագրողների հետ հանդիպման ժամանակ նշել է տնտեսագետ Վիլեն Խաչատրյանը:
Նրա խոսքով, համաշխարհային շուկաները սպասում են ԱՄՆ դաշնային պահուստային համակարգի առանցքային տոկոսադրույքի բարձրացմանը: Թեեւ ԱՄՆ դաշնային պահուստային համակարգի կողմից դրա վերաբերյալ չեն եղել ոչ ուղիղ հայտարարություններ, ոչ էլ անգամ ակնարկներ, սակայն շուկաները հասկանում են, որ վաղ թե ուշ դա տեղի է ունենալու:
Եթե դաշնային պահուստների դաշնային հիմնադրամների տոկոսադրույքները բարձրանան (հիմա այն ընդամենը 0,13 տոկոս է) կարելի է սպասել դոլարի փոխարժեքի բարձրացման:
«Հաշվի առնելով Հունաստանի տնտեսությունում առկա բարդությունները, կարելի է սպասել, որ ներդրողները կփորձեն իրենց ունեցած եվրոն փոխարկել դոլարի: Դա լրացուցիչ կբարձրացնի դոլարի փոխարժեքը եւ այն խնայողությունների համար ավելի գրավիչ կդարձնի»,-հավելել է Խաչատրյանը:
