Զինծառայողի մահվանը հանգեցրած` մարտական հերթապահության կանոնների խախտման համար 3 տարվա ազատազրկման դատապարտված Գեւորգ Հակոբյանը իր պատիժը կկրի ազատության մեջ։ Վերաքննիչ դատարանն այսօր` օգոստոսի 4-ին, առաջին ատյանի դատարանի վճիռը փոխարինեց Քրեական օրենսգրքի 70-րդ հոդվածով` թույլ տալով նրան պատիժը կրել ազատության մեջ` հաշվի առնելով, որ Գևորգ Հակոբյանն այս ընթացքում գերազանց վարք է դրսևորել և հանրության համար վտանգ չի ներկայացնում:
NEWS.am-ի հետ զրույցում Գևորգ Հակոբյանը նշեց, որ ի սկզբանե ինքն իր մեղավորությունն ըդնունել է և շատ է ցավում կատարվածի համար: Նա նշեց, որ ողբերգական դեպքից հետո էլ շարունակում է իր զինվորական ծառայությունը և այս ընթացքում արժանացել է մի շարք պարգևատրումների.
«Ես գիտեմ, որ մեծ վշտի պատճառ եմ դարձել, միշտ էլ ճանաչել եմ մեղքս, սակայն ունեմ անչափահաս երեխա և ընտանիքիս միակ աշխատողը ես եմ, հայրս ու եղբայրս հիվանդ են, չեն կարողանում աշխատել»,– ասաց Գեւորգ Հակոբյանը։
Նշենք, որ Գևորգ Հակոբյանը մեղավոր է ճանաչվել ՀՀ քրեական օրենսգրքի 365-րդ հոդվածի 3-րդ մասով: Նրա մեղքն ապացուցված է համարվել այն բանում, որ եղել է դիրքի ավագ, իմացել է, որ դիրքում զինծառայողներն իրականացնելու են ականազերծման աշխատանքներ, սակայն նրանց չի ուղեկցել առաջնագիծ ու իրավիճակին ամբողջությամբ չտիրապետելով դիտորդի պարտականություններ ստանձնած զինծառայողներ Հայկ Խաչատրյանին և Արմեն Միքայելյանին լիարժեք չի հրահանգավորել: Դրա հետեւանքով երբ զինծառայողները նկատել են կռացած դիրքով ինչ-որ առարկայով խրամուղի մտնող մարդկանց, որոնք իրենց հնչեցրած նշանաբառին պատասխան չեն տվել, ենթադրել են, որ նրանք հակառակորդի զինված դիվերսիոն խմբի անդամներ են եւ կրակահերթ են արձակել նրանց ուղղությամբ: Արման Ղուկասյանը գլխի շրջանում ստացել է հրազենային վիրավորում և տեղում մահացել է, իսկ կապիտան Վարազդատ Զաքարյանը վնասվածք է ստացել ոտքերի ազդրերի շրջանում: