Սահմանադրական բարեփոխումների վերաբերյալ «Բարգավաճ Հայաստան» կուսակցության որոշման ճիշտ գնահատականը քաղաքացիները կտան: Այս մասին NEWS.am –ի թղթակցի հետ զրույցում հայտարարեց «Ժառանգություն» կուսակցության կառավարման փոխնախագահ Արմեն Մարտիրոսյանը: «Ես զերծ կմնամ այս առթիվ մեկնաբանություննել տալուց, քանի որ իմ ասածը կարող է ընկալվել որպես սուբյեկտիվ կարծիք: Գնահատականը կտան մեր քաղաքացիները»,- նշեց Մարտիրոսյանը:
Անդրադառնալով Հայաստանի նախկին նախագահ, «Հայ ազգային կոնգրեսի» առաջնորդ Լեւոն Տեր Պետրոսյանի դեռ վերջերս արտահայտած վստահությանը, որ «ԲՀ» կարող է անցնել ընդդիմադիր ճամբար՝ «Ժառանգության» կառավարման փոխնախագահը նկատեց «Հենց Լեւոն Տեր Պետրոսյանն էլ պետք է իրեն հարցեր տա ստեղծված իրավիճակի մասին: Ամեն դեպքում, այն ինչ կատարվեց «Բարգավաճ Հայաստանի» հետ փետրվարին, պարզապես հակասահմանդրական էր: Իսկ դրանից հետո, ես կարծում եմ որեւէ խնդիր քննարկելն այդքան էլ ճիշտ չէ»: Երկրում ստեղծված իրավիճակը, շարունակեց Արմեն Մարտիրոսյանը, շատ պարզ է: «Կամ մենք կկարողանանք պահպանել այն երկիրը, որտեղ քաղաքացիները ի վիճակի կլինեն պաշտպանել իրենց իրավունքները, այդ թվում սոցիալական, կամ մենք կվերածվենք մի հետամնաց տարածքի, որը վաղ թե ուշ կմտնի մեկ այլ պետության կազմ»,- ամփոփեց «Ժառանգություն» կուսակցության կառավարման փոխնախագահը:
Հիշեցնենք, որ «Բարգավաճ Հայաստան» կուսակցության ղեկավարությունը սահմանադրական բարեփոխումները համազգային հանրաքվեի դնելու օգտին որոշում է կայացրել ու միանալու է փաթեթի ընդունմանն աջակցելու քարոզչությանը: Սակայն ավելի վաղ «Բարգավաճ Հայաստանը» դեմ էր հանդես գալիս Սահմանադրական փոփոխություններին՝ դրանք գնահատելով որպես սեփական վերարտադրումն ապահովելու ՝ իշխանությունների փորձ: