Փորձաքննության եզրակացության համաձայն՝ մայիսի 2-ին Գորիսի «Սդղի գյոլում» Հարություն Զաքարյանին հարվածել է Յուրա Մանուչարյանը: Այս մասին NEWS.am-ի թղթակցի հետ զրույցում ասաց Զաքարյանի հայրը՝ Գագիկ Զաքարյանը:
«Քննչական կոմիտեն 5 ամիս քննություն է անցկացնում, 4 վկաներ ցուցմունք են տվել, փորձաքննությունը ցույց է տվել, որ տղայիս խփողը Յուրա Մանուչարյանն է եղել: Ես հավատում եմ դրան, ինձ համար կարեւորն այն է, որ արդարությունը հաղթի, իմ տղայի առողջությանը վնաս հասցնողները պատժվեն»,- ասաց Գագիկ Զաքարյանը՝ նշելով, որ իր ընտանիքի վրա ոչ ոք ճնշում չի գործադրել եւ իր որդին ցուցմունք չի փոխել:
Հարցին, թե ինչպես է գնահատում, որ Քննչական կոմիտեն միջնորդություն է ներկայացրել Սյունիքի մարզպետի որդուն՝ Տիգրան Խաչատրյանին ազատ արձակելու վերաբերյալ, Գագիկ Զաքարյանը պատասխանեց. «Ինձ համար նշանակություն չունի, թե ով է, ինձ համար կարեւոր է, որ իմ տղային խփողը պատժվի: Իսկ Տիգրան Խաչատրյանն իր արածի չափով ու առաջադրված մեղադրանքով կպատժվի»:
Նշենք, որ Քննչական կոմիտեն արդեն միջնորդություն է ներկայացրել դատախազություն՝ Սյունիքի մարզպետի որդու խափանման միջոցը փոխելու վերաբերյալ:
Հիշեցնենք, որ հուլիսին տուժող Հարություն Զաքարյանը հայտարարել էր, որ հենց Տիգրանն է իր աչքի վնասվածքը հասցրել, ինչից հետո ինքը կորցրել է տեսողությունը։ Տիգրան Խաչատրյանը պնդում է, որ ներկա է եղել վեճին, սակայն որեւէ մեկին վնասվածք չի հասցրել, ինքը միայն փորձել է բաժանել վիճողներին։ Հուլիսի 27-ին Տիգրան Խաչատրյանին մեղադրանք է առաջադրվել Քրեական օրենսգրքի 112-րդ հոդվածի 1-ին մասով: Խափանման միջոց է ընտրվել կալանավորումը:
Ավելի վաղ Քննչական կոմիտեն հաղորդել էր, որ 2015թ. մայիսի 2-ին՝ ժամը 17:00-ի սահմաններում, տեղի է ունեցել վիճաբանություն՝ դրանից ժամեր առաջ Գորիս քաղաքում տեղի ունեցած ավտովթարի կապակցությամբ, որի հետեւանքով վնասվել էր Մուշեղ Զաքարյանի վարած ավտոմեքենայի կողային հայելին։
Վիճաբանության ժամանակ մի խումբ անձանց կողմից բռնություն է գործադրվել Մուշեղ եւ Հարություն Զաքարյանների նկատմամբ, որի հետեւանքով Մ. Զաքարյանին պատճառվել է միջին ծանրության, իսկ Հ.Զաքարյանին` ծանր մարմնական վնաս:
