Թուրքիայի տարածքից դուրս ապրող Թուրքիայի քաղաքացիների համար հոկտեմբերի 8-ից սկսվել են խորհրդարանական ընտրությունները։
Թուրքական Nokta պարբերականի փոխանցմամբ՝ Թուրքիայում նոյեմբերի 1-ին տեղի ունենալիք խորհրդարանի արտահերթ ընտրությունները երկրից դուրս ապրող Թուրքիայի քաղաքացիների համար արդեն սկսվել է, որը կշարունակվի մինչեւ հոկտեմբերի 25-ը։ Արտերկրում ապրող Թուրքիայի քաղաքացիները կարող են մասնակցել ընտրություններին՝ այցելելով թուրքական ներկայացուցչություններ, իսկ սահմաններում տեղակայված ընտրական կետերը կգործեն մինչեւ նոյեմբերի 1-ը։
Ընդհանուր առմամբ, 54 երկրում 113 ներկայացուցչությունում քվեատուփեր են տեղադրվել։ Թուրքիայի կենտրոնական ընտրական հանձնաժողովի տվյալներով արտերկրում գտնվում է ընտրության իրավունք ունեցող 2 մլն 895 հազար քաղաքացի։
Նշենք, որ Թուրքիայում հերթական խորհրդարանական ընտրությունները տեղի են ունեցել հունիս 7-ին, որի արդյունքում «Արդարություն եւ զարգացում» կուսակցությունը չի հավաքել բավարար ձայներ՝ միանձնյա կառավարություն կազմելու համար եւ վիժեցրել է կոալիցիոն կառավարություն կազմելու փորձերը։
Արտահերթ խորհրդարանական ընտրությունները նշանակվել են 2015-ի նոյեմբերի 1-ին։