![](img/news/29/08/11/default.jpg)
Հայաստանը շատ ինտենսիվ եւ սերտ համագործակցում է ՏՐԱՍԵԿԱ-ի հետ: Այս մասին, այսօր՝ հոկտեմբերի 14-ին, Երեւանում ՏՐԱՍԵԿԱ Միջկառավարական հանձնաժողովի Մշտական քարտուղարության գլխավոր քարտուղար Միրչա Չիոպրագայի հետ հանդիպման ժամանակ նշել է ՀՀ տրանսպորտի եւ կապի նախարար Գագիկ Բեգլարյանը:
Միրչա Չիոպրագան իր հերթին կարեւորել է Հայաստանի հետ կազմակերպության հետագա համագործակցությունը. «Մենք բարձր ենք գնահատում ՀՀ տրանսպորտի եւ կապի նախարարության ջանքերը՝ Հայաստանում ՏՐԱՍԵԿԱ-ի կողմից իրականացվող ծրագրերի իրագործմանը նպաստելուն: Վստահեցնում եմ, որ մեր կազմակերպությունն այսուհետ եւս կանի ամենը Եվրոպայից Ասիա տրանսպորտային շարժն առավել ակտիվացնելու համար, որպեսզի Հայաստանը՝ որպես տարանցիկ երկիր, կարողանա օգտվել այդ հնարավորությունից»,- ասել է Միրչա Չիոպրագան:
Հանդիպման ընթացքում Գագիկ Բեգլարյանը ստորագրել է «Եվրոպա-Կովկաս-Ասիա միջանցքի զարգացմանն ուղղված միջազգային տրանսպորտի մասին» Հիմնական համաձայնագրի` «Սեւ եւ Կասպից ծովերում երկաթուղային-լաստանավային համալիրների շահագործման հիմնական սկզբունքների մասին» Տեխնիկական հավելվածը:
Այն Հայաստանին հնարավորություն կտա մեծացնել դեպի Եվրոպա հայկական բեռների փոխադրման ծավալներն ավտոմոբիլային տրանսպորտով եւ երկաթուղային-լաստանավային փոխադրումների միջոցով` Սեւ ծովի Փոթի եւ Բաթումի նավահանգիստներով: Կդյուրացվեն բեռնափոխադրումների գործընթացը, փոխադրող կազմակերպությունների համար կնվազեն փաստաթղթերի ձեւակերպման վարչարարությունը, ժամանակը եւ ծախսերը: Տարանցիկ փոխադրումների իրականացման համար կսահմանվեն արտոնյալ պայմաններ: Փաստաթուղթը խթան կհանդիսանա մուլտիմոդալ փոխադրումների զարգացման համար:
Եվրոպական միության կողմից 1993 թվականից իրականացվող «Եվրոպա-Կովկաս-Ասիա տրանսպորտային միջանցք» ՏՐԱՍԵԿԱ ծրագրում ընդգրկված են Եվրոպական միությունն ու Արեւելյան Եվրոպայի, Կովկասի ու Կենտրոնական Ասիայի տարածաշրջանի 14 անդամ-պետություններ: Հայաստանը ծրագրին մասնակցում է 1993 թվականից: Կազմակերպության 14 անդամ-երկրների թվում են նաեւ մեր 4 հարեւան պետությունները: