Երեւանում նախօրեին մահացած նորածնի հայրը՝ Մակար Անտոնյանը, պնդում է, որ երեխայի մահվան պատճառը բժշկական սխալն է եղել:

«Կինս հղիության ողջ ընթացքում որեւէ խնդիր չի ունեցել, կոնսուլտացիա է անցել Արտաշատի հիվանդանոցում: Հունվարի վերջին կինս վերջին կոնսուլտացիային է գնացել, բժշկուհին ասել է, թե 6-7 օր ունես, հանգիստ գնա տուն: Կինս գալիս է տուն, հետո հաջորդ օրն է  գնում հիվանդանոց, բժշկուհին տեղում չի լինում, հերթապահն էլ կեսարյան հատում անելու փոխարեն, ներարկումներ է անում, որ կինս բնական ճանապարհով ունենա»,- NEWS.am-ի թղթակցին պատմեց Մակար Անտոնյանը:

Մակար Անտոնյանի խոսքով՝ բժիշկները տեղյակ էին, որ պտղի դիրքը տոտիկային է եղել եւ պետք էր կեսարյան հատում անել, սակայն հերթապահ բժիշկն այլ որոշում է կայացնում:

«Արտաշատի հիվանդանոցի բժիշկները երեխուս կյանքը կերան: Ամսի 30-ին ծնվել է երեխաս, ժամեր անց Երեւան ենք տեղափոխել եւ 7 օր անց տղաս մահացավ... պորտալարն էր փաթաթված, գլխուղեղի վնասվածք էր ստացել եւ ամբողջը բժիշկների պատճառով»,- ասաց Մակար Անտոնյանը:

Նորածնի հայրը պատրաստվում է այսօր դիմել ոստիկանություն ու հաղորդում ներկայացնել:

Նշենք, որ ամուսինները բնակվում են Արարատի մարզի Այգեստան համայնքում, ունեն 2 դուստր: