Բեյրութում հրատարակվող «Ազդակ» թերթի գլխավոր խմբագիր Շահան Քանդահարյանը Թուրքիայի վարչապետի տեղեկատվության գծով խորհրդական անունից նամակներ է ստացել, որտեղ վերջինս նրան հրավիրել է մասնակցելու Վանի Աղթամար կղզու Սուրբ Խաչ եկեղեցու պատարագի արարողությանը։ Խմբագիրը, սակայն, մերժել է հրավերը եւ չի մեկնել Թուրքիա։
«Երկիրմեդիա» հեռուստաալիքի հետ զրույցում նա հստակեցրել է իր չմեկնելու պատճառները՝ նշելով, որ «Եթե ամեն ինչ իր բնականոն ընթացքը ստանար, այսինքն՝ վերանային թուրքական կողմի դրած նախապայմանները եւ այդ երկրի կողմից Հայաստանի շրջափակումը, ինչպես նաեւ երկու երկրների միջեւ դիվանագիտական հարաբերություններ հաստատված լինեին, միայն այդ պարագայում հնարավոր կլիներ նկատի ունենալ թուրքական կողմի հրավերը»։
Նշենք, որ Սուրբ Խաչի եկեղեցու պատարագին մասնակցելու հարավեր ստացել են բազմաթիվ այլ սփյուռքահայ լրագրողներ եւս:
Սեպտեմբերի 19-ին Սուրբ Խաչում ընթացող պատարագը լուսաբանելու համար արտերկրից ժամանել է նրանցից ընդամենը 27-ը, իսկ Թուրքիայից հավատարմագրվել է 118 լրագրող։
Նկատենք նաեւ, որ Աղթամարի եկեղեցում նկարահանումներ անելու իրավունքը վերապահված է միայն թուրքական TRT հեռուստաալիքին: Ինչպես Աղթամարից հայտնել է NEWS.am-ի հատուկ թղթակիցը, այլ լրատվամիջոցների ներկայացուցիչներին, հատկապես օտարերկրյա հեռուստաընկերությունների լրագրողներին թույլ են տալիս մեկ-մեկ մտնել եկեղեցի եւ նկարահանումներ կատարել: