Հայաստանի իշխանությունները, ինչ-ինչ շահերից ելնելով ժամանակ առ ժամանակ փոխում են հայոց Եղեռնի միջազգային ճանաչման վերաբերյալ իրենց դիրքորոշումները։ Նույն կերպ վարվում են Ջավախքի հարցում։ Այս մասին հուլիսի 1-ին խոսել է «Երկիր» միության նախագահ Սեւակ Արծրունին։
«Մենք Սահակաշվիլու այցի հետ ոչ մի հույս չենք կապել եւ միշտ ասել ենք, որ Ջավախքի հարցը կտուժի, եթե այն լուծվի Հայաստան-Վրաստան հարաբերությունների շրջանակներում»,-ասել է Արծրունին՝ հավելելով, թե այս հարցը միջազգային բնույթի է եւ ողջ հայության խնդիրն է։ Նա նաեւ հայտնել է Սահակաշվիլու պաշտոնաթողության հետ կապված իր կասկածները. «Ջավախքի իրավիճակը ավելի կբարդանա, քանի որ Վրաստանի բնակչության մեծամասնությունը այս հարցի շուրջ նույն հայացքներն ունի»։
Արծրունին նշել է, որ Վրաստանը նույն կերպ է վերաբերվում երկրի բոլոր ազգային փոքրամասնություններին։ Ըստ բանախոսի, այդ վերաբերմունքը բխում է «Մեկ պետություն, մեկ լեզու, մեկ ազգ» սկզբունքից։ «Նման վերաբերմունքը միշտ ել եղել է, սակայն Սահակաշվիլին ցանկացել է արագացնել այդ ընթացքը, որպեսզի բոլոր հարցերը լուծվեն իր նախագահության ժամանակ»,-ասել է Արծրունին՝ հավելելով, որ Ջավախքի դեպքում դա Սահակաշվիլուն չի հաջողվի։
Նա նաեւ տեղեկացրել է, որ 2009թ-ին Ջավախքի հարցը կքննարկվի Եվրախորհրդում։ «Բայց սա հարցի լուծում չէ, եթե Հայաստանի հասարակությունը եւ հասարակական կազմակերպությունները չաշխատեն այդ ուղությամբ»,- նշել է Արծրունին, ասելով, թե Ջավախքն, ինչպես եւ Լեռնային Ղարաբաղը, տնտեսության, մշակույթի, լեզվի եւ այլ բազմաթիվ խնդիրների լուծման կարիքն ունի։
