«Հայաստանը չուներ այն ամորտիզատորները, որոնք շատ երկրներ ունեին՝ պայմանավորված հանքահումքային ռեսուրսներով եւ ձեւավորված հիմնադրամներով»,- այսօր լրագրողներին հայտնեց ՀՀ ֆինանսների նախարար Տիգրան Դավթյանը՝ մեկնաբանելով փաստը, թե ինչու ԱՊՀ երկրների շարքում տնտեսության անկման ցուցանիշով Հայաստանը ամենաանմխիթար վիճակում է:
«Ռուսաստանը, Ղազախստանը, Ուզբեկստանն ու Ադրբեջանը ունեին բավականին մեծ կուտակումներ եւ այդ ռեսուրսների հաշվին ծածկում են նաեւ իրենց բյուջետային դեֆիցիտը: Հայաստանը չուներ այդ հնարավորությունները, բնականաբար ավելի խոցելի էր գլոբալ տնտեսական ճգնաժամի առումով: Բնական է, որ այդ ճգնաժամը Հայաստանի վրա ավելի սուր է անդրադառնում, որովհետեւ մեր կախվածությունը համաշխարհային շուկաներից, դրսից ներարկումներից ավելի մեծ է»,- ասաց նա եւ հավելեց, որ այստեղ կապ ունեն նաեւ տնտեսության մասշտաբները: «Նույն վիճակում են փոքր տնտեսություն ունեցող երկրները, այդ թվում՝ բալթյան երկրները, որոնց տնտեսական անկումը շատ ավելի մեծ է, քան Հայաստանում: Այնտեղ, եղել են կրճատումներ սոցիալական ոլորտում, նաեւ խնդիրներ են առաջացել բանկային ոլորտում»,- նշեց ֆինանսերի նախարարը: