Սամվել Բաբայանը վերադարձել է, որպեսզի ծառայի որոշակի քաղաքական ուժի: Այդ մասին NEWS.am-ի թղթակցի հետ զրույցում հայտնել է «Մոդուս Վիվենդի» վերլուծական կենտրոնի ղեկավար Արա Պապյանը:
Ընդհանրապես, նրա խոսքով, երբ քաղաքական մեծ տեղաշարժեր են տեղի ունենում, իսկ պատերազմը սադրող գործոններից մեկն է, բոլոր գործող եւ թոշակի անցած քաղաքական ուժերը տարբեր պատճառներով ակտիվանում են. ինչ-որ մեկն ուզում է հայրենիքին ծառայել, ինչ-որ մեկն էլ փորձում է օգտվել ստեղծված իրավիճակից նախկին դիրքերի վերականգնման համար: «Սամվել Բաբայանը, իմ տեսանկյունից, չէր կարող մի կողմ քաշված մնալ, որովհետեւ նա մեծ դեր է խաղացել ղարաբաղյան պատերազմում: Այժմ ոմանք նրա օգնությամբ փորձում են ազդեցություն ձեռք բերել բանակի ինչ-որ թեւի վրա: Ես կարծում եմ, որ դրանով էր պայմանավորված նրա վերադարձը Լեռնային Ղարաբաղ», - նշել է Արա Պապյանը:
Անդրադառնալով Սամվել Բաբայանի համար քաղաքական հեռանկարներին, նա նշել է, որ նրա մասնակցությունից մեծ ակնկալիքներ չունի: «Ես չեմ կարծում, թե նրան թույլ կտան ինքնուրույն խաղացող դառնալ: Նրան բերել են որոշակի քաղաքական ուժի ծառայելու նպատակով», - ընդգծել է Արա Պապյանը` չճշտելով, թե որ ուժի մասին է խոսքը: Սամվել Բաբայանը, շարունակել է նա, ինքը լավ հասկանում է, որ այլեւս ի վիճակի չէ ինքնուրույն խաղացող լինել. նա չունի նման քաղաքական ուժ: «Չնայած նա իր կուսակցությունն է ստեղծել, բայց ֆինանսական հնարավորություններ չունի եւ բավականին երկար է խաղից դուրս եղել», - նշել է Արա Պապյանը: Սակայն, միաժամանակ ընդգծել է փորձագետը, Բաբայանը ազդեցիկ գործոն կլինի ընդհանուր խաղում, հատկապես բանակի տեսանկյունից:
Հիշեցնենք, որ «Սամվել Բաբայան. վերադարձ» քաղաքացիական նախաձեռնության ներկայացուցիչները մայիսի 23-ին հայտարարություն են տարածել, որում նշված է. «Լեռնային Ղարաբաղի Պաշտպանության բանակի հիմնադիր, ԼՂՀ-ի նախկին պաշտպանության նախարար, գեներալ-լեյտենանտ Սամվել Բաբայանը Հայաստան է վերադարձել: Սամվել Բաբայանի փորձը եւ հմտությունները կարող են անգնահատելի դեր ունենալ նաեւ այսօր»: Սավել Բաբայանը վերջին ժամանակներս Մոսկվայում էր:
Երեւան գալով` նա հանդես է եկել առայժմ մեկ հարցազրույցով, որում ապրիլյան դեպքերից հետո ստեղծված իրավիճակն անհանգստացնող է կոչել: Սամվել Բաբայանը խոստացել է մոտ ապագայում ավելի ընդարձակ խոսքով հանդես գալ: «Մի քանի օրից ես Ղարաբաղ կմեկնեմ, որովհետեւ հենց այնտեղ եմ տեսնում իմ վերադարձի գլխավոր առաքելությունը», - հայտնել է նա:
