Gallup գործակալությունը հրապարակել է աշխարհի 114 երկրներում իրականացրած հետազոտությունների արդյունքները՝ կրոնապաշտության մակարդակի մասին: Մեծահասակների միջին բաժինը, որ պնդում է, թե կրոնն իր կյանքի կարեւոր բաղկացուցիչն է, կազմում է 84 տոկոս: Սոցիոլոգների կարծիքով, կրոնապաշտության վրա ուղղակիորեն ազդում է մարդկանց կենսամակարդակը: Որքան մարդիկ աղքատ են, այնքան կրոնասեր են:
Հարցին՝ «Արդյոք կրոնը կարեւոր դե՞ր ունի ձեր կյանքում», Հայաստանում դրական է պատասխանել 73 տոկոսը: Բացասական է պատասխանել հարցվածների 23 տոկոսը: Վրաստանում այդ թիվը համապատասխանաբար 81 եւ 16 տոկոս է, Ադրբեջանում՝ 50 եւ 49 տոկոս, Թուրքիայում՝ 82 եւ 15, իսկ Ռուսաստանում կրոնասեր է բնակչության 34 տոկոսը:
Ամենակրոնասեր երկրները, որտեղ 99 տոկոսը դրական են պատասխանել, Բանգլադեշը, Նիգերիան, Եմենը, Ինդոնեզիան են: Իսկ ամենաոչկրոնասեր երկիրը Էստոնիան է, որտեղ միայն 16 տոկոսն է կրոնը կարեւոր բաղկացուցիչ համարել:
