Նոր ուսումնական տարվա սկզբից (սեպտեմբերի 4) ֆրանսիական դպրոցներում մահմեդական հագուստ կրելու արգելքը վերաբերում է բոլոր աշակերտներին և ներառում է ոչ միայն աբայան՝ կանանց ավանդական մուսուլմանական զգեստ, այլև մուսուլմանական երկրներում տղամարդկանց կոստյումը: Այս մասին France Inter ռադիոկայանի եթերում հայտարարել է Ազգային կրթության և երիտասարդության հարցերի նախարար Գաբրիել Աթալը։
«Դպրոցներում աշակերտներին կդիմավորեն, և նրանց կբացատրեն այս կանոնի իմաստը, թե ինչու չի կարելի դպրոցում աբայա կամ կամիս կրել»,- ասել է նախարարը։ Նա ընդգծել է, որ մուսուլմանական հագուստով դպրոց եկած աշակերտները չեն կարողանա դասարան մտնել։ Աթալը կարծում է, որ «այս կանոնը հասկանալու համար» մի քանի օր կպահանջվի։
Օգոստոսի 27-ին վարչության պետը հայտարարել էր, որ հանրապետության իշխանությունները մտադիր են արգելել դպրոցներում աբայա կրելը։
2004 թվականի մարտից Ֆրանսիայի կրթական հաստատություններում օրինականորեն արգելված է կրոնական խորհրդանիշների կամ կրոնական համոզմունքները խորհրդանշող հագուստ կրելը։ Այդ ժամանակից ի վեր երկրում պարբերաբար բորբոքվում են բանավեճեր՝ ավանդական մուսուլմանական հագուստ կրելու արգելքի թեմայով, որը պահանջվում է հանել ուսումնական հաստատության մուտքի մոտ:
