Ախալքալաքի շրջանի Վաչիանի գյուղի բնակիչները մանրամասներ են պատմում հարեւան ընտանիքում կատարվածի մասին: «Գրուզիա On-line»-ի փոխանցմամբ, նրանք ասել են, որ տնից, որտեղ հայտնաբերվել են 37-ամյա կնոջ եւ նրա երեք երեխաների դիակները, թանկարժեք ոչ մի բան չի գողացվել: Միաժամանակ նրանք հայտնել են, որ հարազատներն ասել են, որ տունը տակնուվրա էր արված, իսկ սպանվածները ծեծի եւ խոշտանգման են ենթարկվել:
«Տեղի է ունեցել սարսափելի բան: Ամբողջ գյուղն ահաբեկված է: Զոհերին հայտնաբերել են ազգականները: Նրանք ծեծի եւ խոշտանգման են ենթարկվել, սակայն թանկարժեք զարդերին եւ փողին ձեռք չէին տվել: Կտրված էր գազատար խողովակը: Հավանաբար մտածել են, որ հրդեհը կմաքրի հանցագործության հետքերը: Ամբողջ գյուղն սպասում է մարդասպանի հայտնաբերմանը», - «Իմեդի» հեռուստաընկերությանն ասել է տեղացիներից մեկը:
Հիշեցնենք, որ Ախալքալաքի շրջանի Վաչիանի գյուղում հայտնաբերվել են 37-ամյա կնոջ եւ նրա 5, 16 եւ 18 տարեկան երեխաների մարմինները: Տանը կինը իր երեք երեխաների հետ մենակ է բնակվել, ընտանիքի հայրը մեկնել էր Ռուսաստան արտագնա աշխատանքի: Առայժմ կատարվածի պատճառներն անհայտ են: Դիերը կենթարկվեն դատաբժշկական փորձաքննության Նինոծմինդայի շրջանային փորձաքննության բյուրոյում: Նախնական տեղեկություններով՝ դեպքը տեղի է ունեցել 2 օր առաջ, բայց միայն երեկ են հարեւանները պատահաբար հայտնաբերել նրանց մարմինները: Ենթադրվում է, որ մորը եւ ավագ դուստրերին մահաբեր վնասվածքները հասցվել են բութ գործիքով, իսկ 5-ամյա տղային խեղդամահ են արել: Վրաստանի ՆԳՆ-ում միջադեպը չեն մեկնաբանում: