Նոր հանգամանքներ հուլիսին ոստիկանության Երեւանի պարեկա-պահակային ծառայության գնդի տարածքի զավթման գործի նախաքննությունում: Պարզվել են ոստիկանության 3 ծառայողների՝ Արթուր Վանոյանի, Յուրի Տեփանոսյանի եւ Գագիկ Մկրտչյանի սպանությունների բոլոր հանգամանքները, հստակ բացահայտվել են այդ սպանությունները կատարած անձինք:
Ավելի վաղ հայտարարվել էր, որ ՊՊԾ գունդը գրավածների խմբում ընդգրկված է եղել 31 անձ՝ զինված ապօրինաբար ձեռք բերված 14 ինքնաձիգով եւ այլ զենք-զինամթերքով: Հետագա նախաքննությամբ պարզվել է, որ հուլիսի 17-ին գունդը զավթելուն մասնակցել է եւս երկու անձ, որոնք նույն օրն իսկ աննկատ հեռացել են՝ իրենց հետ դուրս բերելով նաեւ գնդի զինանոցից հափշտակված «Մակարով» տեսակի երկու ատրճանակ:
Ձեռնարկված միջոցառումների արդյունքում նրանք հայտնաբերվել ու ներգրավվել են որպես մեղադրյալ: Հատուկ քննչական ծառայությունը, սակայն, այդ անձանց անունները չի հրապարակում:
Գործի նախաքննության ներկա փուլում, ընդհանուր առմամբ, որպես մեղադրյալ ներգրավված է 62 անձ, որոնցից 44-ը կալանավորված են, 13-ի նկատմամբ որպես խափանման միջոց կիրառվել է չհեռանալու մասին ստորագրությունը, 3-ի նկատմամբ՝ գրավը, իսկ 2 մեղադրյալի նկատմամբ հայտարարվել է հետախուզում:
Եթե քննարկվում է Լեռնային Ղարաբաղին հարակից տարածքների վերադարձի հարցը, ապա, ԵԱՀԿ Մինսկի խմբի ամերիկացի համանախագահի կարծիքով, պետք է նաեւ նրա կարգավիճակի շուրջ անկեղծ քննարկում սկսել:
Ջեյմս Ուորլիքը նաեւ ողջունում է այն, որ Ադրբեջանի նախագահը սկսել է քննարկել Լեռնային Ղարաբաղի կարգավիճակի հարցը: Հիշեցնենք. Ալիեւը հայտարարել էր, որ Բաքվի կողմից առավելագույն զիջումները ենթադրում են Լեռնային Ղարաբաղին ինքնավար հանրապետության կարգավիճակի տրամադրում:
Ամերիկացի միջնորդը բանակցություններում առաջընթացի համար կարեւոր է համարում Հայաստանի եւ Ադրբեջանի նախագահների քաղաքական կամքի առկայությունը: Վստահ է, որ նման հնարավորություն կա:
Նիկոլ Փաշինյանը կարծում է, որ Մոսկվայում «Ձկնկուլ» մականունով Արմեն Իսրայելյանի սպանության թելերը Հայաստանի Ազգային ժողով են բերում: Հիշեցնենք, որ հոկտեմբերի 23-ին Մոսկվայի բնակարաններից մեկում Հայաստանի երկու քաղաքացու՝ 43-ամյա Էդուարդ Նշանյանի ու 46-ամյա Արմեն Իսրայելյանի մարմիններն են հայտնաբերել: Իսրայելյանի անունը կապում են պատգամավոր Սամվել Ալեքսանյանի հետ:
Էդուարդ Շարմազանովը դժկամությամբ է մեկնաբանել այդ մասին հարցը՝ կոչ անելով խորհրդարանը շոուի վայր չդարձնել:
Վահրամ Բաղդասարյանն էլ Փաշինյանի հայտարարությունը ծանր է որակել, նաեւ բացառել նրա նշած կասկածների հավաստիությունը: Նա կոչ է արել գործընկերներից քաղաքական վրեժ չլուծել:
Սպանություն աղջկա պատճառով ծագած վիճաբանության արդյունքում: Ուկրաինայի Մելիտոպոլ քաղաքում մի խումբ անձինք ալկոհոլ են օգտագործել, իսկ հետո փոխհրաձգություն սկսել: Զոհվել են հայազգի Սարգիս Բաղդասարյանը եւ վրացի Զուրաբ Օնանիձեն: Իրավապահների տեղեկացմամբ՝ վեճը ծագել է աղջկա պատճառով. երիտասարդները նախկինում դատապարտված չեն եղել, քրեական անցյալ չունեն:
Իսպանիայի Մալագա քաղաքի խորհուրդը միաձայն հայտարարության է ընդունել, որով պաշտոնապես ճանաչում եւ դատապարտում է Հայոց ցեղասպանությունը: Փաստաթղթում նախորդ դարասկզբին տեղի ունեցածը բնորոշվում է որպես հանցագործություն մարդկության դեմ: Մալագայի քաղաքային խորհուրդը նաեւ նշել է, որ առաջիկայում քաղաքի կենտրոնական զբոսայգում հայկական խաչքար կտեղադրվի՝ նվիրված Հայոց ցեղասպանության զոհերի հիշատակին:
Հոկտեմբերի 24-ին դոլարն ու եվրոն ամրապնդել են դիրքերը: Արդյունքում դոլարի փոխարժեքը կազմել է 475 դրամ, եվրոյինը՝ 517, ռուբլունը՝ 7 դրամ 66 լումա, ֆունտինը՝ 581 դրամ։
Հոկտեմբերի 26-ին հանրապետության տարածքի մեծ մասում՝ բացառությամբ Երեւանի, Արարատյան դաշտի, Արագածոտնի եւ Վայոց Ձորի նախալեռների, ձյուն է սպասվում, առանձին հատվածներում՝ բուք, ճանապարհներին՝ մերկասառույց: Օդի ջերմաստիճանը կնվազի 4-5 աստիճանով: Երեւանում վաղն անձրեւ է սպասվում: