Ռուսաստանի հայերի միության նախագահ Արա Աբրահամյանը չի մասնակցելու 2017 թվականի Հայաստանի խորհրդարանական ընտրություններին: Ավելի վաղ նա նման ցանկություն հայտնել էր, բայց հիմա իրավիճակը փոքր-ինչ այլ է: Տարատեսակ մեկնաբանություններից խուսափելու համար Արա Աբրահամյանը նաեւ պարզաբանել է. առողջական խնդիրներ ունի եւ բուժվում է արտերկրում: Նա, միաժամանակ, դեռեւս չի որոշել, թե քաղաքական որ ուժին է սատարելու ընտրություններում:
Անդրադառնալով Հայաստանի նորանշանակ կառավարության մասին հարցին՝ Արա Աբրահամյանը նշել է, որ վարչապետ Կարեն Կարապետյանի ծրագրերն ու քայլերը հույսեր են ներշնչում։ Բայց որպեսզի այդ ծրագրերն իրականանան, միասնականություն եւ վստահություն է պետք: Արա Աբրահամյանի կարծիքով, պետք է միասնական աշխատել եւ կենտրոնանալ երեք խնդիրների ուղղությամբ. արցախյան հիմնահարց, Հայոց ցեղասպանության եւ Հայաստանի սոցիալ-տնտեսական խնդիրներ: Նաեւ վստահեցրել է. ինքն էլ կանի ամեն ինչ՝ այդ խնդիրների լուծմանը նպաստելու համար:
Ինչո՞ւ է շաքարավազը թանկացել Հայաստանում: Տնտեսական մրցակցության պաշտպանության պետական հանձնաժողովը սկսել է ուսումնասիրել շաքարավազի շուկան: Հանձնաժողովի ուշադրության կենտրոնում են հատկապես այն շուկաները, որտեղ գերիշխող տնտեսվարողներ կան: Շաքարավազի շուկան նույնպես այդպիսին է, եւ Հանձնաժողովն այստեղ գնային փոփոխություններ է արձանագրել: Նշենք, որ շաքարն ու շաքարի հումքը վերջին ամիսներին թանկանում են ամբողջ աշխարհում: Սակայն, մամուլի հրապարակումների համաձայն, ներկայում խանութներում վաճառվող շաքարավազն արտադրվել է Սամվել Ալեքսանյանին պատկանող շաքարի գործարանում, որի հումքը ներկրվել է դեռեւս այս տարվա առաջին կեսին, երբ շաքարի համաշխարհային գները շատ ցածր էին: Տնտեսական մրցակցության պաշտպանության հանձնաժողովը կպարզի շաքարավազի գնի բարձրացման պատճառների հիմնավորվածությունը, ուսումնասիրության ավարտից հետո էլ կհրապարակի որոշումը:
«Պոբեդա»-ն սկսել է Մոսկվա-Գյումրի ավիատոմսերի վաճառքը: Դեկտեմբերի 15-ից ռուսական բյուջետային ավիաընկերությունը կսկսի Մոսկվայի «Վնուկովո» օդանավակայանից Գյումրիի «Շիրակ» օդանավակայան ու հակառակ ուղղությամբ չվերթները: Ընկերության կայքից տեղեկանում ենք, որ տոմսերի գները սկսվում են 999 ռուբլուց. ընթացիկ փոխարժեքով՝ շուրջ 7400 դրամ: Գործում են ավելի թանկ՝ «Պլյուս» եւ «Պրեմիում» փաթեթներ, որոնց արժեքը, համապատասխանաբար, 5999 ռուբլի կամ շուրջ 44 700 դրամ եւ 2098 ռուբլի կամ շուրջ 15.600 դրամ է:
Արտակարգ դեպք Երեւանում: Նոր Նորքից բնակիչն ահազանգել է, որ պատրաստվում է 9 հարկանի շենք պայթեցնել: Շենքի բնակիչները տարհանվել են, բայց ավելի ուշ պարզվել է, որ ահազանգը կեղծ է եղել։ Ըստ տեղեկությունների՝ ահազանգող 39-ամյա Էմիլ Պետրոսյանը, որը բնակվում է Աբովյան քաղաքում, ցանկացել է պատկան մարմինների ներկայացուցիչներին ահազանգով հավաքել եւ մեկ այլ բողոք ներկայացնել: Պետրոսյանն ամուսնալուծված է եւ բողոքում է, որ կինը թույլ չի տալիս տեսնել իրենց երեխային։ Փաստի առիթով հետաքննություն է կատարվում։
Անչափահասների մասնակցությամբ դանակահարությունը բացահայտվել է: Ոստիկանությունը տեղեկացնում է, որ Մարալիկի երեք անչափահաս բնակչի դանակահարության մեջ կասկածվում է 16-ամյա Սերյոժա Մ.-ն։ Պարզվել է, որ նոյեմբերի 12-ին Մարալիկի մանկապատանեկան մարզադպրոցի բակում Հառիճ գյուղից 16-ամյա Սերյոժան եւ եղբայրը՝ 22-ամյա Ռուստամը, վիճել են երեք անչափահասների հետ եւ ձեռնամարտի բռնվել։ Սերյոժան նաեւ դանակով հարվածել է հասցրել նրանց: Քրեական գործ է հարուցվել՝ մարդկանց առողջությանը դիտավորյալ ծանր վնաս հասցնելու հատկանիշներով:
Հռիփսիմե Խուրշուդյանից հետ կվերցնեն 2012 թվականին նվաճած մեդալը: Միջազգային օլիմպիական կոմիտեն 2012 թվականի Լոնդոնի Օլիմպիական խաղերի մասնակիցների դոփինգ նմուշների վերահետազոտման հիման վրա Հայաստանի ներկայացուցիչ, 29-ամյա Հռիփսիմե Խուրշուդյանին զրկել է օլիմպիական բրոնզե մեդալից։ Օլիմպիական շարժման ղեկավար մարմինը Հայաստանի ազգային օլիմպիական կոմիտեին պարտավորեցրել է վերադարձնել մեդալը, պատվոգիրն ու հուշամեդալը: Խուրշուդյանը, սակայն, չի պատրաստվում վերադարձնել մեդալը: Մամուլի հրապարակումների համաձայն՝ մարզուհին ասել է, որ եթե խթանիչներ է օգտագործել, նույն պահին թող որակազրկեին: Նա պնդում է, որ միայն վիտամիններ են օգտագործում, այն էլ՝ բժշկի հսկողությամբ:
Նոյեմբերի 22-ին դոլարը նորից սկսել է վերելք ապրել: Արդյունքում դոլարի փոխարժեքը կազմել է 479 դրամ, եվրոյինը՝ 510, ռուբլունը՝ 7 դրամ 54 լումա, ֆունտինը՝ 598 դրամ։
Նոյեմբերի 23-ին հանրապետության տարածքում սպասվում է առանց տեղումների եղանակ: Օդի ջերմաստիճանն աստիճանաբար կնվազի 2-3 աստիճանով: Երեւանում նույնպես վաղը տեղումներ չեն սպասվում:
