«Բարգավաճ Հայաստան» կուսակցության դեկտեմբերի 3-ին սպասվող խորհրդի նիստը ընթանալու է Գագիկ Ծառուկյանին քաղաքականություն վերադարձնելու խնդրագրի շրջանակում: Կուսակցության համագումարը նախատեսված է փետրվարին: Համագումարի բովանդակությունն ու հետագա գործողությունների սցենարը կախված է հենց դեկտեմբերի 3-ի նիստի արդյունքից, որի ժամանակ ԲՀԿ-ականները խնդրագիր կներկայացնեն Ծառուկյանին վերադառնալ քաղաքականություն: Վերջինիս պատասխանն էլ կհստակեցնի համագումարի առանցքային ասելիքը:
ԲՀԿ խմբակցության պատգամավոր Լյովա Խաչատրյանը NEWS.am-ի հետ զրույցում չհերքեց կուսակցության նախկին ղեկավարի վերադարձի վերաբերյալ սպասվող քննարկումը: « Չեմ կարծում` հարցը խնդրագրի հետ է կապված: Խորհուրդը իր մոտեցումները կներկայացնի այդ մասով եւ կդիմի, հավանաբար, պարոն Ծառուկյանին, որպեսզի վերադառնա»,-ասաց Լյովա Խաչատրյանը` հավելելով, որ վերադարձը կախված է միայն Ծառուկյանի կամքից:
«Չեմ կարծում`ուրիշ հարցեր կարող են լինել, նման ցանկություն ունեն կառույցները, որի համար խորհրդի նիստ է հրավիրվելու, թե ինչպիսին կլինի Ծառուկյանի պատասխանը, կապրենք` կտեսնենք»:
Հարցին`առանց Ծառուկյանի ունե՞ն այնքան ռեսուրս, որ 2017-ին զբաղեցնեն 2-րդ տեղը, պատասխանեց. «Գյումրիի ընտրությունները ցույց տվեցին` ինչ ռեսուրսներ ունենք: Իհարկե այն չի լինի, ինչ Ծառուկյանի ժամանակ էր»:
Պատգամավորի խոսքով` Ծառուկյանի վերադարձով ավելի մեծ դիրքերի կհասնեն:
