Եվրոպայում գործող հայ գործարարները պատրաստ են վերագործարկել «Նաիրիտը», սակայն նրանց առաջարկները չեն ընդունվում կառավարության կողմից։ Այս մասին այսօր՝ դեկտեմբերի 8-ին, տեսակապով լրագրողների հետ հանդիպմանը ասաց Սլովակիայում հայ գործարար, EU-ASIA Business Finance Centre հոլդինգի նախագահ Աշոտ Գրիգորյանը։
Նրա խոսքով՝ ինքն իր գործընկերների հետ պատրաստ է նախնական 20 մլն եվրո ներդնել գործարանը նորից վերագործարկելու եւ մոդեռնիզացնելու համար 8-10 ամիսների ընթացքում։ «Մենք մի խտասկավառակ ենք ուղարկել ե'ւ կառավարությանը, ե'ւ առանձին Էներգետիկայի նախարարին, սակայն նրանք ոչ մի կերպ, ոչ մի գրավոր նամակով չեն արձագանքել դրան։ Միայն Էներգետիկայի նորանշանակ նախարարը մի թուղթ է ուղարկել` անիմաստ հարցերով, որոնց պատասխանները կային խտասկավառակում»,- ասաց Աշոտ Գրիգորյանը։
Սպառողական վարկեր առանց գրավի մինչև 2,000,000 ՀՀ դրամ Մինչև դեկտեմբերի 30-ը «Մինչև 2,000,000 ՀՀ դրամ առանց գրավի սպառողական վարկերը» տրամադրվում են ավելի ցածր՝ ընդամենը 19-21% տարեկան տոկոսադրույքով: |
Եվրոպահայ գործարարներին առաջարկած ծրագրով նախատեսվում է, որ EU-ASIA Business Finance Centre հոլդինգը տրամադրելու է միջոցները, իսկ բուլղարացի գործարարները զբաղվելու են մոդեռնիզացիայով։ Ծրագրին մասնակցելու են նաեւ իրանցի գործարարները, որոնք, Աշոտ Գրիգորյանի խոսքով, չափազանց հետաքրքրված են «Նաիրիտով»։
Աշոտ Գրիգորյանը հանդիպմանը մասնակցող՝ «Նաիրիտի» նախկին աշխատակիցներին խորհուրդ տվեց չհավատալ իշխանությունների պնդումներին, թե գործարանը վնասով է աշխատել։ «Ինչպե՞ս կարող էր վարչապետ Տիգրան Սարգսյանը իր եղբորը «Նաիրիտի» տնօրեն նշանակել, եթե գործարանը վնասով էր աշխատում։ Չհավատաք այդ հայտարարությանը»,- ասաց նա։
Ավելի վաղ տեղեկացրել էինք, որ «Նաիրիտ» գործարանը 2016թ. նոյեմբերի 28-ին առաջին ատյանի դատարանի վճռով սնանկ է ճանաչվել։ Համաշխարհային պահանջարկ ունեցող քլորոպրենային կաուչուկ արտադրող ձեռնարկությունը չի գործում 2010–ի ապրիլից։ Կառավարությունը ներդրողների է փնտրում, իսկ մինչեւ հունիսի 15–ը պատրաստվում է գործարանի վերագործարկման հարցի շուրջ խորհրդակցություններ անցկացնել ռուսական «ՌԿ–Քիմկոմպոզիտ» ընկերության հետ։