Ավստրիայի ԱԳ նախարար Սեբաստիան Քուրցը մտադիր է ուժեղացնել ԵԱՀԿ գործունեությունը Ուկրաինայի խնդրի լուծման համար։ Այս մասին նա ասել է Deutsche Welle–ին տված հարցազրույցում։ ԵԱՀԿ ավելի քան 700 դիտորդներ Ուկրաինայի արեւելքում լրացուցիչ տեխնիկական միջոցներ կստանան, նրանց առաքելությունը տարածաշրջանում կերկարաձգվի։

Քուրցը շնորհակալություն է հայտնել ԵԱՀԿ–ում անցյալ տարի նախագահած Գերմանիայի ԱԳ նախարար Ֆրանց Վալտեր Շթայնմայերին եւ գովել Գերմանիայի միջնորդ նախաձեռնությունները։ «Իրավիճակն այսօր ավելի լավ է, քան նախկինում»,– ասել է Քուրցը եւ հավելել, որ Ավստրիան ջանալու է շարունակել հակամարտության կարգավորմանն ուղղված այդ փոքր քայլերը։

Նրա կարծիքով  Ուկրաինայի  հակամարտության դեպքում գլխավոր խնդիրը վստահության բացակայությունն է։ ԵԱՀԿ խնդիրը նա տեսնում է միջնորդ առաքելության հաջողության մեջ։ «Ուկրաինան չի հավատում Ռուսաստանին։ Իսկ Մոսկվան այնպիսի տպավորություն ունի, որ Եվրոպան եւ ԵՄ–ն շահագրգռված են ոչ թե Ռուսաստանի հետ լավ հարաբերություններով, այլ միայն խնդրի լուծմամբ»,– ասել է նախարարը։