Հունվարի 20-ին պարզ դարձավ, որ Հայաստան - Ուզբեկստան ընկերական հանդիպումը, որը պետք է տեղի ունենար փետրվարի 12-ին թուրքական Անթալիա քաղաքում, տեղի չի ունենա: Հետաքրքիրն այն է, որ այդ մասին մենք իմացանք Ուզբեկստանի ֆուտբոլի ֆեդերացիայի պաշտոնական կայքից: Մինչեւ այդ մի քանի օր շարունակ շշուկներ էին պտտվում, թե խաղը տեղի չի ունենա, բայց Հայաստանի ֆուտբոլի ֆեդերացիան ոչ մի կերպ չէր արձագանքում:
Ըստ Ուզբեկական կողմի ՀՖՖ-ն խաղը որոշել է չեղյալ համարել Թուրքիայում առկա քաղաքական անկայուն վիճակի պատճառով եւ ներողություն է խնդրել Ուզբեկստանի ֆեդերացիային պատճառած անհարմարության համար:
Քիչ առաջ ՀՖՖ-ն պարզաբանեց.
«Հաշվի առնելով այն հանգամանքը, որ վերջին շրջանում Թուրքիայի տարածքում հաճախակի բնույթ են կրում ահաբեկչական ակտերը, անվտանգության նկատառումներից ելնելով, Հայաստանի ֆուտբոլի ֆեդերացիան որոշում է կայացրել հրաժարվել Ուզբեկստանի հավաքականի հետ ընկերական հանդիպումից»:
Այստեղ երկու հարց է առաջանում: Իսկապե՞ս պատճառը Թուրքիայի ներքաղաքական վիճակն է ու ահաբեկչական ակտերի վտանգ է: Այդ երկում միշտ էլ տեղի են ունենում ներքաղաքական խնդիրներ: Այս պահին կարծես պատերազմական ոչ մի լուրջ իրադարձություն չկա: Խաղը տեղի էր ունենալու ոչ թե Ստամբուլում կամ Սիրիայի սահմանին, այլ ծովափնյա Անթալիայում, որտեղ այս պահին բազմաթիվ ակումբներ անց են կացնում իրենց ձմեռային հավաքները: Բացի այդ հայկական մի քանի ակումբ եւս իրենց ձմեռային հավաքներից մեկը նախատեսում են անցկացնել Թուրքիայում:
Այն, որ այդ երկրում այդքան էլ ապահով չէ պարզ դարձավ միայն ա՞յս պահին: Իսկ խաղը նշանակելուց առաջ այդ մաղին չգիտեի՞ն կազմակերպիչները:
Երկորդը հարցը. ինչո՞ւ ենք մենք դա իմանում ուզբեկներից: Եթե ՀՖՖ-ն է որոշել չեղյալ համարել խաղը, ինչո՞ւ պետք է հայ երկրպագուն իմանան հավաքականի մասին նորությունը այլ ֆեդերացիայի կայքից:
Եվ վերջում՝ երբ պարզ դարձավ, որ Հայաստանի ազգային հավաքականը ընկերական խաղ է անցկացնելու Թուրքիայում, բոլորի մոտ մեծ զարմանք առաջացավ: Մի քանի տարի առաջ ՀՖՖ նախագահը հայտարարել էր, որ Հայաստանի հավաքականը երբեք այդ երկրում չի խաղա՝ բացառությամբ եթե այդ թիմերը ընտրական փուլերում նույն խմբում լինեն: Բայց հիմա, արի ու տես, որ պատրաստվում էին խաղալ: Թե ինչու այդ որոշումը փոխվեց, NEWS.am-ը նամակով դիմեց ֆեդերացիային, սակայն այդպես էլ պատասխան նամակը չեղավ:
Եվս մեկ հարց հայ ֆուտբոլասերի համար համերժ կմնա անհասկանալի...
Իսկ մինչ այդ հիշեցնենք, որ Հայաստանի ազգային հավաքականի հաջորդ պաշտոնական հանդիպումը տեղի կունենա Երևանում մարտի 26-ին ԱԱ 2018-ի ընտրափուլի շրջանակներում Ղազախստանի հավաքականի հետ :
Վերա Մարտիրոսյան