Կոտայքի Լեռնանիստ գյուղում մթերային խանութ է փլուզվել. երկու մարդ է մահացել: Մահացածներից մեկը խանութի սեփականատիրոջ կինն է՝ 50-ամյա Ալմիդա Մեսրոպյանը, մյուսը՝ հաճախորդ, 31-ամյա Անուշ Սարգսյանը:
Դեպքի պահին խանութում են եղել նաեւ աշխատակցուհին՝ 23-ամյա Տաթեւիկը, եւ խանութի տիրոջ երկու որդիները: Նրանք էլ հորը տեղեկացրել են ողբերգության մասին: Վարկած կար, որ շինությունը փլուզվել է պայթյունի հետեւանքով, բայց խանութի սեփականատեր Գագիկ Ալոյանն ասում է՝ գազ չկար:
Գագիկ Ալոյանի 2 որդիները վնասվածքներ են ստացել: Սարգիս Ալոյանը կոնքի, ազդրի եւ ողնաշարի կոտրվածքներով Երեւան է տեղափոխվել, իսկ Արթուր Ալոյանն առաջին բուժօգնություն ստանալուց հետո տուն է գնացել: Հիվանդանոցում է նաեւ խանութի աշխատակցուհի Տաթեւիկը:
Ալավերդիում 33-ամյա ծննդկան է մահացել: Նա Թեղուտ գյուղի բնակչուհի Անժելա Ղազարյանն է: Գիշերը երիտասարդ կինն Ալավերդու բուժկենտրոնում բնական ճանապարհով տղա է լույս աշխարհ բերել, ինչից հետո նրա մոտ արյունահոսություն է սկսվել, իսկ առավոտյան մահացել է: Բուժկենտրոնի տնօրենը տեղեկացրել է, որ մահվան պատճառն արգանդի պատռվածքն է: Սա Անժելայի 4-րդ ծննդաբերությունն է: Կինը տարիների ընթացքում նաեւ հղիության արհեստական ընդհատումներ է արել, ինչի արդյունքում, մասնագետի հավաստմամբ, արգանդը լավ վիճակում չի եղել: Անժելայի հարազատները, սակայն, կատարվածի մեջ բժիշկներին են մեղադրում:
Իսկ Ջաջուռում արտակարգ դեպք է գրանցվել: Գյուղի 30-ամյա հղի բնակչուհին բակում գտնվող զուգարանում ծննդաբերել է, եւ երեխան, կնոջ հավաստմամբ, հորն է ընկել: Իրավապահները փորձում են պարզել դեպքի հանգամանքները:
Եվս մեկ ողբերգություն Ալավերդիում: Դեբեդ գետում 5-ամյա երեխայի դի են հայտնաբերել: Փոքրիկ Ռոբերտ Դալլաքյանն առավոտյան ինքնուրույն դուրս է եկել մանկապարտեզի տարածքից, եւ մինչ այստեղ կնկատեին երեխայի բացակայությունը, նրա դին հայտնաբերել են Դեբեդում: Փոքրիկը մանկապարտեզ էր հաճախում ընդամենը մեկ շաբաթ:
Խորհրդարանական ընտրություններին մասնակցության համար անհրաժեշտ փաստաթղթերը ԿԸՀ ներկայացնելու համար երկու օր է մնացել, սակայն կուսակցություններն ու դաշինքները դժվարությամբ են կողմնորոշվում ընտրացուցակների հարցում:
Երկար ժամանակ սպասման մեջ պահելուց հետո ՀՀԿ-ն վերջապես հրապարակեց կուսակցության համապետական ընտրացուցակի առաջին հնգյակի անունները: Հանրապետականի ընտրացուցակը գլխավորելու է պաշտպանության նախարար Վիգեն Սարգսյանը:
Հատկանշական է, որ վարչապետ Կարեն Կարապետյանի անունը չկա, գոնե ընտրացուցակի առաջին տասնյակում: Շարմազանովն ասել է, որ եթե ՀՀԿ-ն կառավարություն կազմի, ապա նա վարչապետը կլինի: Իսկ Հանրապետականի նախընտրական շտաբը գլխավորելու է Հայաստանի նախագահ Սերժ Սարգսյանը, շտաբի աշխատանքներում ներգրավված կլինեն կուսակցության Գործադիր մարմնի բոլոր անդամները:
Որոշակի հստակություն կա նաեւ «Ելք» դաշինքում. համապետական ընտրացուցակի գոնե առաջին եռյակի անունները հայտնի են: Դաշինքը կգլխավորի Էդմոն Մարուքյանը, որին ցուցակում կհետեւեն, համապատասխանաբար, Արամ Սարգսյանն ու Նիկոլ Փաշինյանը: Նրանց, ինչպես հայտարարել էին, ընտրել են հրապարակային, բայց մյուս հորիզոնականներում տեղ զբաղեցրած թեկնածուների մասին ոչինչ չեն նշել:
Փոխարենն արդեն սկսել են քննադատել մրցակիցներին։ Այսօր «Ելք»-ի թիրախում Օհանյան-Րաֆֆի-Օսկանյան դաշինքն էր: Արամ Սարգսյանին զայրացրել է «Ժառանգության» բռնած դիրքը. իրենց գերադասում են մյուս կուսակցություններից, բայց փորձը ցույց է տվել, որ այդ պահվածքն իրեն չի արդարացնում:
Էդմոն Մարուքյանն էլ հիշել է Սեյրան Օհանյանի անցած ուղին, հատկապես 2008 թվականին զբաղեցրած պաշտոնը: Սա էլ՝ մարտի 1-ի իրադարձությունների եւ մեղավորներին բացահայտելու հայտարարությունների հետ կապված: Մարտի 1-ի դեպքերից խոսել է նաեւ Օսկանյանը՝ Նիկոլ Փաշինյանին տանելով Երկրորդ համաշխարհային պատերազմի ժամանակներ:
Վաղը նախընտրական ցուցակն է հրապարակելու նաեւ ՀՅԴ-ն: Իսկ մինչ այդ, ընտրություններին ընդառաջ՝ Հայաստանի ճակատագրով ակտիվորեն մտահոգվում են սփյուռքի հայտնի հայերը: Սփյուռքահայ մի շարք գործիչներ «Արդարություն Հայաստանում» արշավ են նախաձեռնել եւ պատրաստվում են դիտորդի կարգավիճակով հետեւել ընտրություններին: Նախաձեռնության հեղինակներից Սերժ Թանկյանն այսօր տեսաուղերձ է հրապարակել:
Ի պաշտպանություն Արթուր Սարգսյանի՝ Երեւանում երթ էին կազմակերպել. Ազատության հրապարակից մինչեւ գլխավոր դատախազությն շենք: Հավաքի մասնակիցները «Հաց բերողին» ազատ արձակելու պահանջով նամակ են փոխանցել գլխավոր դատախազության աշխատակցին, նրա համար սնունդ փոխանցել ու ցրվել:
«Սասնա ծռեր»-ին օժանդակելու մեջ մեղադրվող Արթուր Սարգսյանն ազատ էր արձակվել 2016 թվականի դեկտեմբերի 31-ին՝ ազատազրկման հետ անհամատեղելի հիվանդության պատճառով: Փետրվարի 9-ին, սակայն, նորից կալանավորվել էր: Դատախազությունը պարզաբանել է, որ նա խախտել է խափանման միջոցի՝ չհեռանալու մասին ստորագրության պայմանները: Պատշաճ ծանուցվել է, բայց չի ներկայացել Հատուկ քննչական ծառայություն՝ համապատասխան դատավարական գործողությունների մասնակցելու համար: Արդյունքում նրան կալանավորելու որոշում է կայացվել:
Դոլարի վերելքն այսօր վերջապես կանգ է առել, իսկ եվրոն էժանացել է: Արդյունքում դոլարի փոխարժեքը կազմել է 486 դրամ, եվրոյինը՝ 516, ռուբլունը՝ 8 դրամ 44 լումա, ֆունտինը՝ 606 դրամ:
Փետրվարի 15-ին հանրապետության շրջանների մեծ մասում կրկին ձյուն է սպասվում, առանձին հատվածներում՝ մառախուղ: Օդի ջերմաստիճանն էապես չի փոխվի: Երեւանում նույնպես վաղը ժամանակ առ ժամանակ ձյան տեղումներ կլինեն: