Թուրքիայում Հայոց պատրիարքի հետ կապված վերջին սկանդալային իրադարձություններից հետո Ստամբուլի հայ համայնքի մի խումբ ազդեցիկ գործիչներ նամակով դիմել են Ամենայն Հայոց Կաթողիկոս Գարեգին Բ-ին։
Ինչպես տեղեկացնում է Ստամբուլի հայկական «Ակոս»-ը, նամակում նշվում է, որ Պոլսո հայց պատրիարքի աթոռը 8 տարի ազատ է, իսկ պետության ձեռքով փոխպատրիարք նշանակված Աթեշյանի օրոք մի շարք բացասական իրադարձություններ են տեղի ունեցել։ «Ցավոք, Արամ սրբազանը 1915-ի մեր կորուստներն առհամարել է, որը մեր հոգում մեծ վերքերի հետք էր թողել։ Սակայն մեր սփոփանքն այն է, որ ապրիլի 24-ին Թուրքիայի տարբեր քաղաքներում միջոցառումներ են տեղի ունենում։ Իսկ պատրիարքարանը խնդիրները լուծելու փոխարեն դարձել է խնդիրներ ստեղծող կառույց»,-գրել են պոլսահայերը՝ խնդրելով Կաթողիկոսին հեռացնել արք․Արամ Աթեշյանին։
Նամակի տակ ստորագրել են Տիգրան Ալթունը, Նազարեթե Բինաթլըն, Ավետիս Դեմիրը, Խոսրով Քյոլեդավիթօղլուն, Կարո Կապրիելյանը, Ադամ Սարգիսը եւ այլք։
Նշենք, որ մոտ օրերս Կաթողիկոսի կոչով Էջմիածին են գալու Պոլսո հայոց փոխպատրիարք արք․Արամ Աթեշյանն ու Պոլսո հայոց պատրիարքարանի հոգեւոր խորհրդի առաջնորդ, եպիսկոպոս Սահակ Մաշալյանը։