Երեւանի Շենգավիթ վարչական շրջանի դեղատներից մեկում 25-ամյա աշխատողին դանակահարելու դեպքի առթիվ քրեական գործ է հարուցվել:
NEWS.am-ին Քննչական կոմիտեից հայտնեցին, որ քրեական գործը հարուցվել է Քրեական օրենսգրքի 112-րդ հոդվածի 1-ին մասով, այն է` դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը: Նշանակվել են դատաբժշկական, դատակենսաբանական, դատահետքաբանական փորձաքննություններ: Կատարվում է նախաքննություն:
Մեր տեղեկություններով, դանակահարված երիտասարդը Հերացու անվան բժշկական համալսարանի ուսանող է, աշխատռում էր դեղատանը` երեկոյան հերթափոխով:
Հիշեցնենք, որ փետրվարի 16-ին 25-ամյա երիտասարդին դանակահարել էին դեղատանը: Դանակը մտել էր անմիջապես սիրտը, բժիշկներին հաջողվել է փրկել երիտասարդի կյանքը: