Պետությունը պետք է մեծ ջանքեր ներդնի դատապարտյալների իրավունքների պաշտպանության համար: Այս մասին փետրվարի 27-ին՝ մամուլի ասուլիսի ժամանակ հայտարարեց Հայաստանի օմբուդսմեն Արման Թաթոյանը:
Հարցին՝ Հայաստանում կա՞ն եւ եթե այո, ապա քանի՞ քաղբանտարկյալ, օմբուդսմենը պատասխանեց, որ արդեն մի քանի անգամ ասել է, որ նման պնդումների համար իրավական հիմք չունի:
«Սակայն դատապարտյալների հետ կատարվող աշխատանքն իր գործունեության հիմնական ուղղություններից մեկն է: Կարծում եմ, որ պետությունը պետք է ավելի մեծ ջանքեր ներդնի այս մարդկանց իրավունքներն իրականացնելու համար»,- հայտարարեց օմբուդսմենը:
Թաթոյանի խոսքով՝ օմբուդսմենի մասին նոր օրենքի ուժի մեջ մտնելուց հետո առաջարվում է նոր կառույց ստեղծել, որը պահման վայրերի մոնիթորինգով կզբաղվի ահազանգերի չսպասելով: «Հույս ունենք խմբի մեջ բժշկից բացի, նաեւ հոգեբանի ընդգրկել»,- նշեց մարդու իրավունքների պաշտպանը՝ հավելելով, որ ՔԿՀ-ներում խնդիրներ կան՝ պայմանավորված օբյեկտիվ եւ սուբյեկտիվ պատճառներով:
Նոր օրենքով նաեւ նախատեսվում են պահման անպատշաճ պայմանների եւ խոշտանգումների կանխման տեխնիկական միջոցներ: Օմբուդսմենը դրանց թվում նշեց հաստատությունների լուսավորության եւ խոնավության որոշման սարքերը: Հաստատված է այն վայրերի ցուցակը, որտեղ պետք է ստուգումներ անցկացվեն: Առաջին հերթին դա մեկուսարաններն են, նաեւ դատապարտյալների տեղափոխման տրանսպորտային միջոցները:
