ԵԱՀԿ Մինսկի խումբը փորձում է ինքն իրեն փրկել, իր գոյությունը պահպանել: Այս մասին փետրվարի 28-ին հայտարարեց ռուսաստանցի քաղաքագետ Ալեքսանդր Սկակովը՝ ելույթ ունենալով «Ղարաբաղյան հակամարտության գոտում իրավիճակի լարվածության ներքին եւ արտաքին գործոնները» թեմայով քննարկման ընթացքում:
Նրա խոսքով՝ Ադրբեջանին, իհարկե, այս խմբի գոյությունը ձեռնտու չէ: «ԵԱՀԿ Մինսկի խմբին կարելի է հանդիմանել պասիվության, անկարողության համար, սակայն այն ղարաբաղյան հակամարտության կարգավորման խաղաղ գործընթացի միակ ձեւաչափն է»,- նշեց Սկակովը:
Անցյալ տարվա գարնանային լարվածությունից հետո բոլոր կողմերի վրա ճնշում է գործադրվել, շարունակեց քաղաքագետը: «Եվ դա Ադրբեջանին ստիպեց համաձայնվել որոշ պայմանավորվածությունների (Վիեննայում եւ Սանկտ Պտերբուրգում – խմբ.), սակայն հասկանալի էր, որ դրանք ստորագրված չեն, եւ Բաքուն կարող է հեշտորեն դրանցից հրաժարվել, ինչը եւ արեց»,- հիշեցրեց Ալեքսանդր Սկակովը՝ նշելով, որ այս պայմաններում Երեւանը եւ Ստեփանակերտը պետք է Ադրբեջանի սադրանքներին պատասխանելու, նույնիսկ անհամաչափ պատասխանելու հնարավորություն ունենան:
«Այդուհանդերձ, եթե խաղաղության մասին ենք մտածում, մշտադիտարկման համակարգի ստեղծումն անհրաժեշտություն է, սակայն առայժմ նման գործընթացի առանձնահատուկ հեռանկարներ չեմ տեսնում»,- եզրափակեց փորձագետը:
