Հայաստանի հանրապետական կուսակցության մամուլի խոսնակ Էդուարդ Շարմազանովը Ջիվանու հայտնի խոսքերն է հիշել՝ լսելով «Ծառուկյան» դաշինքի առաջնորդ Գագիկ Ծառուկյանի հայտարարությունը՝ Հայաստանում 15 միլիարդ ներդրում անելու մասին:
«Եթե մերը 5 մլրդ է, իրենը՝ 15 մլրդ, ես Ջիվանուն հիշեցի՝ «Մեր բլուրը իր բարձր սարին վնաս չէ»: Աստված տա՝ մեր երկրում ներդրումները 15 միլիարդ չլինեն, այլ 25-30 միլիարդ, դրանից միայն ժողովուրդը կշահի: Աստված տա Հայաստանում ներդրումները շատանան, թող բոլորը բերեն: Իմ ցանկությունն է բոլոր գործիչներին, որ անկախ նրանից, թե ով հաջողության կհասնի ընտրություններում, խթանեն երկրում ներդրումների իրականացումը: Եթե այդքան լավ ընկերներ ունի, ես հավատում եմ, որ ունի, անկախ նրանից ՀՀԿ-ն հաջողության կհասնի, «Ծառուկյան» դաշինքը, թե ՀԱԿ-ը, թե մեր սիրելի կոմունիստները, ով էլ գա իշխանության, մեր խնդիրը պետք է լինի խրախուսել ներդրումները»,-ասաց նա:
Էդուարդ Շարմազանովը նաեւ նշեց, որ Հայաստանի հանրապետական կուսակցությունն արդեն հայտարարել է, որ Հայաստանում նախատեսում է 5 միլիարդի ներդրում եւ հստակ ներկայացվել է, թե յուրաքանչյուր մարզում որքան ներդրում է նախատեսվում:
«Մենք արդեն մենք մինչեւ 5 միլիարդի հստակ ներդրումային ծրագրի մասին հայտարարել ենք, մեր վարչապետի թեկնածու Կարեն Կարապետյանը դրա մասին խոսել է ոչ թե վերջին պահին, այլ հենց յուրաքանչյուր համայնքում, մարզում հանդիպումների ժամանակ հասցեական: Չեմ կարող ասել, թե նրանցը ցանկությունների, երազանքների ժանրից է, բայց կարող եմ ասել, որ լավ է, եթե Հայաստանում ներդրումներն ավելանան»,-ասաց նա:
Ավելի վաղ տեղեկացրել էինք, որ Գագիկ Ծառուկյանը «Ծառուկյան» դաշինքի ամփոփոխիչ միջոցառման ժամանակ հայտարարել էր, որ իր գործընկերները պատրաստ են Հայաստանում 15 միլիարդ դոլարի ներդրում անել: