ՀՀ նախագահ Սերժ Սարգսյանն այսօր՝ ապրիլի 11-ին, ընդունել է Վրաստանի արտաքին գործերի նախարար Միխեիլ Ջանելիձեին:
ՀՀ նախագահի մամուլի գրասենյակից NEWS.am-ին հայտնում են, որ ողջունելով հյուրին՝ Հանրապետության նախագահը հույս է հայտնել, որ նախարար Ջանելիձեի պաշտոնական այցը Հայաստան կլինի արդյունավետ եւ նոր խթան կհաղորդի միջպետական կապերի ամրապնդմանը: ՀՀ նախագահը եւ Վրաստանի արտգործնախարարը երկուստեք գոհունակությամբ են փաստել, որ հայ-վրացական հարաբերությունները դինամիկ զարգանում են՝ առկա է ակտիվ քաղաքական երկխոսություն, խորանում են տնտեսական հարաբերությունները եւ համագործակցությունը հումանիտար ոլորտում:
Սերժ Սարգսյանն ընդգծել է, որ Հայաստանի համար բարեկամ Վրաստանի հետ հարաբերությունները թանկ են, եւ մեր երկիրը շահագրգիռ է այդ բարիդրացիական հարաբերությունները տարեցտարի զարգացնել ու ավելի ամրապնդել:
Զրուցակիցները ջերմությամբ են հիշել մոտ մեկ տարի առաջ Երեւանում ունեցած հանդիպումն ու արդյունավետ քննարկումները:
Նախարար Միխեիլ Ջանելիձեն բարձր է գնահատել դիվանագիտական հարաբերությունների հաստատումից ի վեր անցած 25 տարիներին երկկողմ միջպետական հարաբերությունների ամրապնդման ուղղությամբ իրականացված զգալի աշխատանքը, նշելով, որ հատկապես վերջին տարիներին այդ հարաբերությունները բոլոր մակարդակներում եւ միջոլորտային շփումներում ակտիվացել են:
Նա առանձնահատուկ նշել է էներգետիկ ոլորտում փոխգործակցությունը՝ ընդգծելով, որ անհրաժեշտ է անել ամեն հնարավորը այդ ոլորտում առկա մեծ ներուժը լիարժեքորեն օգտագործելու համար:
Հանդիպմանն անդրադարձ է եղել նաեւ բազմակողմ ձեւաչափով փոխգործակցության զարգացման հնարավորություններին, ԵՄ հետ երկխոսությանն ու համագործակցության ծրագրերին, տարածաշրջանային խնդիրներին եւ մարտահրավերներին, ԼՂ հիմնահարցի կարգավորման գործընթացին: Հանրապետության նախագահը եւ Վրաստանի արտգործնախարարը տարածաշրջանի զարգացման տեսանկյունից երկուստեք կարեւորել են կայունությունն ու խաղաղությունը:
Նախարար Ջանելիձեն շնորհավորել է նախագահ Սերժ Սարգսյանին՝ Հայաստանում միջազգային չափանիշներին համապատասխան խորհրդարանական ընտրությունների անցկացման եւ Հայաստանի Հանրապետական կուսակցության հաղթանակի կապակցությամբ: