Հայաստանում կարելի է եւ պետք է կարգավորել սերմերի ու պարարտանյութերի համար եկամտաբեր բիզնեսը։ Այս մասին ապրիլի 13-ին Կառավարության նիստի ժամանակ հայտարարել է ՀՀ վարչապետ Կարեն Կարապետյանը։
Նրա խոսքով՝ պետք է ներդրողների գտնել, որոնք կհետաքրքրվեն այդ շուկայով եւ պատրաստ կլինեն աշխատել։ Այդ արտադրություններն այնքանով են կարեւոր Հայաստանի համար, որ կփոխարինեն ներկրվողներին։ Հեռանկարային կարող է լինել ոչ միայն հանքային, այլեւ օրգանական պարարտանյութերի արտադրությունը, հավելել է վարչապետը։
Վարչապետը գյուղատնտեսության նախարար Իգնատի Առաքելյանին հանձնարարել է մեկ ամսվա ընթացքում ուսումնասիրել գյուղատնտեսական կայանների գործունեությունը Պետական ագրարային համալսարանի հետ համատեղ։ Դրանից հետո հնարավոր կլինի եւ պարարտանյութերի եւ սերմերի վերաբերյալ բինզես ծրագրեր առաջարկել։
«Պետական մարմինների բոլոր արտադրողական գործառույթները (օրինակ՝ Գյումրու սելեկցիոն կայանը) պետք է փորձել փոխանցել մասնավոր ոլորտին։ Նախարարությունները պետք է դառնան կենտրոններ ուղեղի առումով, այլ ոչ թե բիզնեսի։ Իսկ ներդրողներ մենք կփնտրենք։ Դուք ծրագրերը կազմեք, իսկ մենք կօգնենք»,- նշել է Կարապետյանը։
