«Ելք» դաշինքը այսօր՝ ապրիլի 21-ին երթ է անում Երեւանի Մոսկովյան փողոցից դեպի Հյուսիսային պողոտա, որտեղ հանրահավաք է լինելու, ապա համերգ՝ «Ներմա» ռոք խմբի մասնակցությամբ։
NEWS.am-ի թղթակիցը հայտնում է, թե երթից առաջ Նիկոլ Փաշինյանը պատասխանեց լրագրողների հարցերին՝ նշելով, որ դաշինքը գնում է հաղթանակի Երեւանի ավագանու ընտրություններին։ Նա նշեց, որ հաղթանակի դեպքում համագործակցելու է բոլոր ուժերի հետ, որոնց նպատակը Երեւանի զարգացումն է։ Նույնիսկ ՀՀԿ-ի՞, այս հարցին էլ Փաշինյանը պատասխանեց. «Այո, եթե ՀՀԿ-ն լինի ընդդիմություն ավագանիում եւ կառուցողական առաջարկներ ներկայացնի»։ Դաշինքի ցուցակը գլխավորող Նիկոլ Փաշինյանը Երեւանի խնդիրների երեք խումբ առանձնացրեց՝ բազմաբնակարան շենքերի վիճակը, մանկապարտեզների վիճակը եւ կանաչապատման ու սանիտարական վիճակի խնդիրները։
Այնուհետ, երթի մասնակիցները՝ Նիկոլ Փաշինյանի, Արամ Սարգսյանի եւ Էդմոն Մարուքյանի գլխավորությամբ, երթ սկսեցին Երեւանի փողոցներով։ Նրանք «Երեւան ջան, ելք կա» վանկարկելով անցել են Մոսկովյան փողոցով, իսկ այժմ՝ Մաշտոցի պողոտայով։
