Այնպիսի տպավորություն է, թե բոլորը դժգոհ էին ընտրությունների արդյունքներից, միայն «Ելք» դաշինքն է գոհ։ Այդ մասին այսօր՝ ապրիլի 21-ին Հյուսիսային պողոտայում հանրահավաքի ընթացքում ասել է ԱԺ պատգամավոր Էդմոն Մարուքյանը։
«Ես ասում եմ՝ մեր ակնկալիքներն այլ էին, բայց մեր դաշինքը ակնածանքով է մոտենում մարդկանց ընտրությանը»,- ասել է Մարուքյանը։
Նա խոսել է Երեւանի ավագանու քարոզարշավի մասին, նշել, թե «ՀՀԿ ներկայացուցիչները լուրջ դեմքերով ասում են՝ մենք վստահ ենք, ի՞նչ դեբատ»։ Մարուքյանի խոսքով, քաղաքակիրթ աշխարհում առաջին դեմքերը գնում են բանավեճի, բանավիճում արվածի եւ ապագայի միջեւ։ ՀՀԿ-ն համառորեն հրաժարվում է բանավեճից։
«Տարոն Մարգարյանը երրորդ անգամն է ուզում դառնալ քաղաքապետ։ Մտածում են, թե մարդիկ մոռացել են, ոնց էին ուզում տրանսպորտի ուղեվարձը 200 դրամ դարձնել։ Ինչո՞վ եք վստահ, որ ճարտարապետական կառույցները ոչնչացրել եք, տպարանի շենքը պայթեցրել եք։ Իսկ վարչապետն էլ ժողով է անում ու զարմանում, թե ինչու են թոզ արել»,- նշել է Մարուքյանը։
««Ելք» դաշինքը մասնակցում է ընտրություններին առողջ, անկաշառ, անբիծ մարդկանց թիմով։ Մենք առաջադրել ենք քաղաքապետի թեկնածու Նիկոլ Փաշինյանին։ Մենք վստահ ենք, որ հաղթելու ենք այս ընտրություններին»,- ասել է Մարուքյանը։