ՌԴ–ում 18 մարդու կյանք խլած ավտովթարի գործով 6 տարվա եւ 9 ամսվա դատապարտման ազատազրկված Հրաչյա Հարությունյանը կփոխանցվի Հայաստան: Այս մասին NEWS.am-ին ասաց Հայաստանի արդարադատության նախարարի տեղակալ Վիգեն Քոչարյանը:
«Հայաստանի իշխանությունները, Արդարադատության նախարարությունը հետեւողական ջանքեր են գործադրել Հրաչյա Հարությունյանի փոխանցման խնդրի լուծման ուղղությամբ եւ ներկայումս նրա՝ Հայաստան փոխանցելու հարցում ֆինանսական պարտավորությունների առկայության խոչընդոտը վերացված է», - ասաց փոխնախարարը:
Նշենք, որ Հրաչյա Հարությունյանի դեմ ներկայացված ֆինանսական փոխհատուցման պահանջը չկատարելը արգելք էր հանդիսանում դատապարտյալի փոխանցման համար:
Հրաչյա Հարությունյանի տեղափոխման ժամկետների մասին դեռեւս վաղ է խոսելը:
Հիշեցնենք, որ Հրաչյա Հարությունյանը «Կամազ» մակնիշի մեքենայով 2013թ. հուլիսի 13-ին ՌԴ Պոդոլսկի շրջանի մերձակայքում բախվել էր մարդատար ավտոբուսին, ինչի հետեւանքով զոհվել էր 18 մարդ: Հայ վարորդը դատապարտվել էր 6 տարի ու 9 ամիս ազատազրկման: