Մարդու իրավունքների եվրոպական դատարանը հիմա քննարկում է առաջին հերթին Ադրբեջանի նախագահ Իլհամ Ալիեւի որոշման իրավաչափության հարցը եւ համապատասխանությունը Եվրոպական կոնվենցիային: Այս մասին մայիսի 18-ին՝ նոր գումարման ԱԺ առաջին նիստի շրջանակում լրագրողների հետ զրույցում ասաց Հանրապետական կուսակցությունից ընտրված պատգամավոր, նախկին գլխավոր դատախազ Գեւորգ Կոստանյանը:
Նրա խոսքով՝ Հայաստանն այս գործին ներգրավված է որպես երրորդ կողմ: «Եվ մենք հիմնավորել ենք, որ Ալիեւի կողմից Սաֆարովին ներում շնորհելը հակասում է Մարդու իրավունքների եվրոպական կոնվենցիայի պահանջներին»,- ընդգծեց Կոստանյանը:
Հիշեցնենք, որ 2004 թվականի փետրվարին ՆԱՏՕ-ի «Գործընկերություն հանուն խաղաղության» ծրագրի շրջանակում Բուդապեշտում անգլերենի դասընթացներ էին անցկացվում: Դրանց մասնակցում էին հայ եւ ադրբեջանցի սպաներ, այդ թվում՝ ապագա զոհ Գուրգեն Մարգարյանն ու նրան սպանած Ռամիլ Սաֆարովը: Փետրվարի 19-ի գիշերը Սաֆարովը թափանցում է հայ սպաների սենյակ եւ կացնահարում քնած Գուրգեն Մարգարյանին՝ նրա դեմքին կացնի 16 հարված հասցնելով:
2006 թվականի ապրիլի 13-ին Բուդապեշտի դատարանը Սաֆարովին դատապարտել էր ցմահ ազատազրկման՝ առանց 30 տարի ժամկետով համաներման իրավունքի: Դատարանում Սաֆարովը փոխել էր ցուցմունքները, հրաժարվել նախնական հայտարարությունից՝ պատճառաբելով, որ վատ գիտի ռուսերեն եւ անգլերեն: 2012 թվականի օգոստոսի 31-ին, Հունգարիայի վարչապետ Վիկտոր Օրբանի որոշմամբ, Սաֆարովին արտահանձնեցին Ադրբեջանին, որտեղ նրան անհապաղ նախագահի կողմից ներում շնորհվեց, բարձրացվեց նրա ծառայողական աստիճանը եւ նվերներ ստացավ՝ բնակարան եւ 8 տարվա աշխատավարձը:
Հունգարիայի այդ քայլին ի պատասխան՝ Հայաստանը դադարեցրեց այդ երկրի հետ դիվանագիտական հարաբերությունները:
Սաֆարովի հանձնումը, Ադրբեջանում ներում շնորհելը եւ հերոսականացումը դատապարտել են ԱՄՆ նախագահ Բարաք Օբաման, ԱՄՆ Պետքարտուղարությունը, Ռուսաստանի եւ Ֆրանսիայի ԱԳ նախարարությունները, Եվրոպայի խորհրդի գլխավոր քարտուղարը, ՀԱՊԿ գլխավոր քարտուղարը, ՆԱՏՕ-ն եւ միջազգային իրավապաշտպան կազմակերպությունները: Դատապարտող բանաձեւ է ընդունել նաեւ Եվրախորհրդարանը: