Իրանը կշարունակի ջանքերը, որպեսզի որոշակի երկրներ չմիջամտեն ղարաբաղյան հակամարտությանը: Հուլիսի 21-ին Երեւանում լրագրողների հետ հանդիպմանն այս մասին հայտարարեց տարածաշրջանային հարցերով իրանցի փորձագետ Էհսան Հուշմանդը՝ նկատի ունենալով Թուրքիայի պաշտոնատար անձանց, մասնավորապես՝ ԱԳ նախարար Մեւլութ Չավուշօղլուի վերջին հայտարարությունները:
Նրա խոսքով՝ Իրանը ղարաբաղյան հակամարտության կարգավորումը տեսնում է բացառապես խաղաղ ճանապարհով:
«Մենք կցանկանայինք, որ Իրանն ավելի լայն ներգրավվածություն ունենար հակամարտության կարգավորման գործընթացում, որպեսզի կարողանար կանխել ռազմական գործողությունների հնարավոր վերսկսումը: Ոչ մի երկրի շահերից չի բխում հիմնախնդրի ռազմական լուծումը: Մենք վստահ ենք, որ տարածաշրջանի երկրների խելամիտ քաղաքականության արդյունքում խնդրի արդարացի լուծում կգտնվի»,- ընդգծել է Էհսան Հուշմանդը:
Հիշեցնենք, որ Թուրքիայի ԱԳ նախարար Մեւլութ Չավուշօղլուն ԵԱՀԿ Մինսկի խմբին կոչ էր արել ակտիվացնել ջանքերը՝ ղարաբաղյան հակամարտության լուծման համար՝ նշելով Ադրբեջանի «բռնազավթված» տարածքներից հայկական զորքերի դուրսբերման անհրաժեշտությունը:
