Շամիրամ գյուղում տեղի ունեցած ողբերգական միջադեպի մասին քննչական կոմիտեն նոր մանրամասներ է ներկայացրել: Պարզվում է՝ միջադեպից առաջ հանցագործության մեջ կասկածվող Թելման Քալաշյանը գումարային հարցերի շուրջ հեռախոսով խոսել է իր ազգականի հետ ու պահանջել վերադարձնել վերջինի բարեկամին տված պարտքը: Ծագած վիճաբանությունից հետո Քալաշյանը մեքենայով գնացել է գերեզմանատան մոտ գտնվող սգո սրահ, հայհոյանքներ հնչեցրել ու կրակոցներ արձակել. արդյունքում, հիշեցնենք, 4 մարդ մահացել է, 7 վիրավոր կա: Դեպքից հետո Թելման Քալաշյանը փախուստի է դիմել, սգո սրահում գտնվողներից մեկը հետապնդել է նրան ու իր ավտոմեքենայով բախվել Քալաշյանի «Նիվա»-ին. այն հայտնվել է ճանապարհին հարակից դաշտում եւ անսարքության պատճառով կանգնել: Թելման Քալաշյանին մեկ այլ մեքենայով օգնության է հասել նրա հորեղբայրը, եւ միասին փախուստի են դիմել: Վերջինը ձերբակալվել է, իսկ Թելման Քալաշյանի նկատմամբ հետախուզում է հայտարարված:
Օգոստոսի 6-ը եւ 7-ն ամենաշոգ օրերը կլինեն հանրապետությունում: Այդ օրերին Արարատյան դաշտում եւ Երեւանի ցածրադիր շրջաններում օդի ջերմաստիճանը կարող է հասնել +41, +42 աստիճանի: Նման ջերմաստիճան կարող է գրանցվել նաեւ Իրանի հետ սահմանին՝ Մեղրի եւ Ագարակ քաղաքներում, Արաքսի հովտում: Մասնագետները զգուշացնում են, որ արեւի ուղիղ ճառագայթների տակ երկարատեւ ֆիզիկական աշխատանքը կարող է հանգեցնել արեւահարության:
«Սասնա ծռեր»-ի 14 անդամների գործով դատական նիստ չի լինի մինչեւ օգոստոսի 23-ը. դատարանն արձակուրդ է գնում: Մինչ այդ դատավոր Արտուշ Գաբրիելյանը փաստաբաններին առաջարկել էր արձակուրդ գնալ, վերջինները մերժել էին: Այս հարցն այսօրվա դատական նիստում քննարկման առարկա է դարձել: Իսկ պաշտպաններն այսօր բոլոր ամբաստանյալներին դատարանի դահլիճ բերելու միջնորդություն են ներկայացրել: Փաստաբանները հիշեցրել են, որ ամբաստանյալներն իրենց բացակայության դեպքում պաշտպաններին արգելել են մասնակցել նիստին: Արտուշ Գաբրիելյանը, սակայն, անտեսել է այս հիմնավորումն ու մերժել միջնորդությունը: Դատավորի որոշումից հետո պաշտպանները լքել են դատարանի դահլիճը եւ նիստը հետաձգվել է: Մինչ այդ, սակայն, Արտուշ Գաբրիելյանը հասցրել է դատական սանկցիա կիրառել փաստաբանների նկատմամբ:
Երեւանում 2015 թվականի փետրվարին 8 ամսական երկվորյակներին մահացու վրաերթի ենթարկելու մեջ մեղադրվող վարորդը դատապարտվել է 7 տարվա ազատազրկման: Էպիլեպսիայով տառապող Ռազմիկ Ավետիսյանին դատարանը 3 տարով զրկել է նաեւ տրանսպորտային միջոց վարելու իրավունքից: Հիշեցնենք, որ ողբերգական վրաերթը տեղի էր ունեցել Նորք-Մարաշ թաղամասում: Վարորդը վրաերթի էր ենթարկել 82-ամյա մի կնոջ, ապա 29-ամյա Աննա Հարությունյանին եւ նրա երկու փոքրիկներին: Վրաերթի հետեւանքով երկվորյակները մահացել էին, իսկ Աննան մարմնական վնասվածքներով հիվանդանոցում էր հայտնվել:
«Վեոլիա ջուր»-ը ցանկանում է դիմել Հանրային ծառայությունները կարգավորող հանձնաժողով՝ ջրի սակագինը բարձրացնելու խնդրանքով: Նշենք, որ «Վեոլիա ջուր»-ը նախկինում ջրով ապահովում էր Երեւանն ու մայրաքաղաքի շրջակայքը, իսկ ամբողջ հանրապետության ջրամատակարարման լիցենզիան ստացել է 2017 թվականի հունվարի 1-ից: Պայմանագրի համաձայն՝ ընկերությունն առնվազն 2 տարի չի կարող սակագների բարձրացում պահանջել: Ներկայում 1 խ.մ. ջրի սակագինը 180 դրամ է, իսկ «Վեոլիա ջուր»-ն առաջարկում է այն հասցնել 194.3 դրամի: Խոշոր բաժանորդների համար էլ սակագինը 54 դրամ է, որն առաջարկվում է հասցնել 58.3-ի: Հանրային ծառայությունները կարգավորող պետական հանձնաժողով սակագնի մասին հայտ ներկայացնելով՝ ընկերությունը պետք է փաստաթղթերով հիմնավորի պահանջը:
Մեկ լուր էլ «Գազպրոմ Արմենիա»-ից: Օգոստոսի 3-ից 30 օրով կդադարեցվի Հայաստան բնական գազի մատակարարումը: Պատճառը Հյուսիսային Կովկաս-Անդրկովկաս գազատարի վրա իրականացվելիք շինարարական աշխատանքներն են: Ընկերությունից, սակայն, վստահեցնում են, որ դա որեւէ կերպ չի ազդի հանրապետության սպառողների գազամատակարարման վրա:
Վրաստանի նախկին նախագահի գլխին սեւ ամպեր են կուտակվում: ԱՄՆ-ում գտնվող Միխայիլ Սահակաշվիլին երեկ հայտարարեց, որ մտադիր չէ թաքնվել Միացյալ Նահանգներում, Ուկրաինա է վերադառնալու եւ դատի է տալու իշխանություններին՝ իրեն այդ երկրի քաղաքացիությունից զրկելու համար: Այսօր արդեն Ուկրաինայի գլխավոր դատախազը հայտարարել է, որ Օդեսայի նախկին նահանգապետը, երկրում հայտնվելուց հետո, կարտահանձնվի Վրաստանին, իսկ այստեղ նրա դեմ քրեական գործ կա հարուցված: Յուրի Լուցենկոն, սակայն, պարզաբանել է, որ դրա համար նախ հարկավոր է, որպեսզի Կիեւը Թբիլիսիից արձահանձնման հերթական հարցումը ստանա:
Օգոստոսի 2-ին դոլարը փոքր-ինչ էժանացել է՝ կազմելով 478 դրամ: Եվրոյի փոխարժեքն այսօր կազմել է 566, ֆունտինը՝ 633 դրամ, ռուբլունը՝ 7 դրամ 89 լումա:
Օգոստոսի 3-ին հանրապետությունում սպասվում է առանց տեղումների եղանակ: Մինչեւ օգոստոսի 7-ն օդի միջին օրական ջերմաստիճանը նորմայից բարձր կլինի 5-6 աստիճանով, ուլտրամանուշակագույն ճառագայթման ինդեքսը՝ 6: Երեւանում վաղը գիշերը կդիտվի +24+26, ցերեկը՝ +38+39 աստիճան տաքություն: